Biseda në çadër, çfarë thanë për zgjedhjet sot gazetarët, sociologët, juristët, ekonomistët e mbledhur pranë kauzës së opozitës

Sot në çadrën e të djathtëve kishin shkuar opinionistë, gazetarë, ekspertë dhe qytetarë që folën për shqetësimin e rrezikut të votimeve pa opozitën. 

Sociologu Ergys Mërtiri tha se i vinte keq që edhe 27 vite pas shembjes së komunizmit shqiptarët ende protestojnë për zgjedhje të lira.

“Nuk ka rëndësi nëse je shumicë apo pakicë, pasi edhe sikur qytetarët e çadrës së protestës të ishin pakicë, e drejta është pikërisht tek përfshirja e pakicës në pushtet, në qeverisje. Monizmi është jo vetëm në politikë, por edhe në biznes dhe shoqëri civile, media dhe kulturë” ,tha ai duke theksuar faktin se në mediat shqiptare nuk ka më hapësira opozitare që shprehin alternativën ndaj qeverisjes aktuale. “Është në dinjitetin tonë të protestojmë e të mos lejojmë të kthehemi në telajon e kryeministrit, ku çdo mendim i tij duhet t’i imponohet gjithkujt, pavarësisht nëse shoqëria mendon se është ide e dështuar”, -tha Mërtiri.

Gazetari Fitim Zekthi u shpreh se sfida me të cilën po përballet vendi sot është mundësia e futjes në zgjedhje të njëanshme të shumicës qeverisëse.

“Mënyra se si një qeveri mund të kthehet në tirani, është dëshmuar gjatë këtyre katër viteve,  tani imagjinoni që kjo të jetë e vetme në qeverisjen e vendit, pa kontrollin e pushteteve dhe ‘checks and balances’, se çfarë mund të ndodhë. Ajo që sot duket e pamundur, nesër mund të bëhet e pakontrollueshme, sa kohë tirania e shumicës lihet e pakontrolluar politikisht, mediatikisht apo kur tolerohet nga vetë elita intelektuale e vendit”,- tha ai. 

Ibrahim Hackaj, ekonomist, u shpreh se në mënyrë që vendi të mund të përparojë parlamenti i shqiptarëve duhet të përbëhet nga njerëz intelektualë.

“Parlamenti është i inkriminuar, kjo do të thotë se edhe niveli i tij është i dobët, por nuk mund të shkohet me këtë parlament, ku për hir të qasjes në Europë duhet njerëz me aftësi shkencore”, -tha Hackaj.

Mirlinda Çollaku, juriste, është nëna e një djali 15 vjeçar të ardhmes së të cilit i trembet për shkak të modelit që fëmijëve u ofrohet sot.

“Më shumë se nga fjalët e mia, djali im edukohet me modelin që sheh dhe shoqëria jonë për fat të keq ka inspiruar nëj model ku ska rëndësi sa njohuri ke, por sa lidhje ke me të fortët e zonës dhe të qytetit”,tha ajo.

(M.D/Shuplaka)