Departamenti i Hetimeve në Policinë e Kosovës ndërmerr dy operacione policore në 77 lokacione të vendit. Nga ky aksion kanë përfunduar në pranga 16 persona.
Aksioni u zhvillua në qytetet: Prishtinë, Pejë, Gjakovë, Gjilan, Ferizaj, Prizren dhe Mitrovicë.
Sektori i Hetimeve të Krimit të Organizuar në kuadër të DHKO-së, pas hetimeve të zhvilluara për ushtrim të veprimtarisë së paligjshme të lojërave të fatit ditën e djeshme, nëpërmjet operacionit të koduar “BLIC” ka kontrolluar lokacionet.
Gjatë këtij operacioni janë sekuestruar si provë materiale, 3 ruleta, 2 tavolina pokeri,69 aparate të lojërave të fatit,2 lojëra Keno,2 armë,546 fishekë,17 PC,3 DVR,9 telefona celularë,41 260 euro.
Kurse në operacionin tjetër të udhëhequr nga Drejtoria për Hetimin e Krimeve Ekonomike dhe Korrupsionit (DHKEK), Sektori për hetimin e krimeve ekonomike, pas një pune të gjatë, kanë zbatuar Urdhëresën e Gjykatës Themelore në Gjilan, për kontrollimin e një lokali të lojërave të fatit në rrugën Gjilan-Kamenicë afër fshatit Shillovë.
Në lokal është vërejtur një pjesë e ndarë, ku sipas policisë zhvillohej veprimtaria e jashtëligjshme.
Gjatë këtij operacioni janë sekuestruar si prova materiale, 10030 Euro, 200 franga zviceriane,100 dollarë Amerikan dhe të ashtuquajturat Chips dhe Zare.
