Shoqatat e Biznesit kanë kundërshtuar ashpër paketën fiskale të vitit 2023. Gjatë një konference të përbashkët, ku prezente ishin Dhoma e Tregtisë dhe Industrisë Tiranë, Shoqata e Prodhuesve të Birrës, Ndërtimit, Riciklimit, Eksportuesve pati diskutime dhe kritika.
Kreu i Dhomës së Tregtisë Nikolin Jaka tha se amnistia fiskale është e padrejtë, sepse dekurajon sipërmarrjen e ndershme.
“Dhoma e Tregtisë ka qenë këtu e 12 vjet prezent me një draft të amnistisë fiskale. Kemi shpenzuar kohë për të bërë një draft të parë mirë me precedencat e vendeve të tjera. Dhe megjithëse ne u fokusuam shumë te ky draft qeveria e mori dhe e përdori për interesat e saj pa e dialoguar me sipërmarrjen private. Kemi një draft që është lançuar më shumë me debate por nuk jemi ulur me grupet e interesit. Amnistia dekurajon sipërmarrjen e ndershme por nga ana tjetër çdo sipërmarrës i ndershëm përveç pasojave që ka pasur e pranon më mirë dhe më shpejt që të amnistohet kjo sipërmarrje dhe të futet në garën e ligjshmërisë. Që të mos dekurajojmë sipërmarrjen private duhet që institucionet përgjegjëse për implementin e amnistisë fiskale të jenë evidente dhe të parashikuar në projektligj.
Nuk ka asnjë nen që parandalon informalitetin. Duhet të shikojmë kush janë problemet e sipërmarrjes private. Duhet që instrumentet që pas daljes së kësaj amnistie fiskale. Ndryshe kjo amnisti do bëjë qokën e radhës, kjo klasë politike ka 32 vjet që e bën”, tha Jaka.
Projektpaketa fiskale e vitit 2023 nuk ka ndryshime thelbësore në ligjet e tatimeve përveçse rrit penalitetet për disa kategori dhe veprime të bizneseve dhe unifikon akcizën për industrinë e birrës dhe pijeve alkoolike.
