Biznesmeni shqiptar akuzohet për mashtrim, INTERPOL e sjell nga Bullgaria në Tiranë

Një biznesmen shqiptar është arrestuar nga forcat e INTERPOLIT, pasi akuzohet për mashtrimin e një shume të konsiderueshme eurosh. Mësohet se biznesmeni shqiptar me iniciale S.R, resident në Danimarkë, është dënuar me 12 vite burg nga Gjykata e Rrethit Gjyqësor të Tiranës, që më 22 nëntor të vitit të kaluar.

Arrestimi i 54-vjeçarit u bë i mundur nga Interpol Sofia i Bullgarisë, dhe në bashkëpunim me Interpol Tiranën është ekstraduar në Shqipëri.

NJOFTIMI I PLOTË I POLICISË

“Interpol Tirana.

Nga Specialistët e Interpol Tirana u krye ekstradimi nga Sofia/Bullgari, drejt vendit tonë, i shtetasit:

S.R., 54 vjeç, lindur në Maqedoni.

Shtetasi S.R., ishte i shpallur në kërkim ndërkombëtar pasi Gjykata e Rrethit Gjyqësor Tiranë, me vendimin penal nr. 3652, datë 22.11.2016, e ka dënuar me 12 vjet burgim, për kryerjen e veprës penale të “Mashtrimit”, parashikuar nga neni 143/2 të Kodit Penal të Republikës së Shqipërisë.

Përmbledhje faktesh:

Shtetasi S.R., resident në Danimarkë, pronar i një kompanie me seli në Slloveni, me objekt importimi dhe/ose shitblerjen e pajisjeve elektronike, kompjuterave, telefonave celulare, fotokopjeve dhe pajisjeve të tjera në fushën e elektronikës (në bashkëpunim me kompani të ndryshme të huaja dhe vendase në zbatim të kontratës së nënshkruar me një kompani private në Shqipëri ka përvetësuar nëpërmjet mashtrimit një shumë të konsiderueshme Eurosh.

Interpol Tirana, në bashkëpunim me Interpol Sofia/Bullgari realizuan arrestimin provizor dhe ekstradimin e tij drejt Shqipërisë.” (D.D/Shuplaka)