Ministri i Brendshëm, Bledi Çuçi ka dalë në një konferencë të jashtëzakonshme mbrëmjen e sotme ku ka njoftuar se kanë nisur procedurat për shpalljen “Dëshmor i Atdheut” të policit të vrarë në krye të detyrës, Saimir Hoxha.
Ministri thotë se do t’i ofrohet ndihma e nevojshme familjarëve të policit të ndjerë që ra ditën e sotme në krye të detyrës, gjatë një operacioni në Lezhë, ku i riu Aldi Rama e qëlloi për vdekje me plumb në zemër.
Ministri po ashtu premtoi se nuk do të ndalim asnjë moment të vëmë para drejtësisë këdo që guxon të ngrejë dorën e krimit mbi Policinë.
“Komisioni Qendror i Statusit “Dëshmor i Atdheut” ka nisur procedurat për shpalljen e oficerit Saimir Hoxha, “Dëshmor i Atdheut” duke i garantuar familjes së tij të gjithë vëmendjen dhe mbështetjen e dhënë me ligj të posaçëm.” tha Çuçi ndër të tjera.
21 vjeçari Aldi Hoxha qëlloi veten e tij teksa i fshihej policisë për orë të tëra dhe refuzonte të dorëzohej. Gjendja e të riut paraqitet mjaft e rëndë. Ai fillimisht u dërgua në spitalin e Lezhës dhe më pas u transportua në spitalin e Traumës. Dyshohet se policia po kryente një aksion anti-kanabis në Lezhë ku janë asgjesuar mëngjesin e sotëm mbi 100 rrënjë kanabis. Tre police, mes tyre Saimir Hoxha i janë afruar një makine të dyshimtë, teksa mjeti i tyre nuk kishte fenelina. Hoxha ka shkuar pranë makinës ku është qëlluar pa paralajmërim nga Rama.
Deklarata e plote:
Mirëmbrëma,
Jam në ketë komunikim, në një orë të pazakontë, pasi siç jeni në dijeni, paraditen e sotme në Ishull Lezhë, ra në krye të detyrës oficeri i Policisë së Shtetit, Saimir Hoxha. Nënkomisar Saimir Hoxha ishte pjesë e grupit të kontrollit të territorit, për evidentimin dhe asgjësimin e lëndëve narkotike.
Autori i ngjarjes, Aldi Rama, një i ri i dënuar më herët në fushën e narkotikëve, u neutralizua pas disa orësh rrethim nga forcat speciale të policisë. Grupi i posaçëm hetimor, nën drejtimin e Prokurorisë po vijon hetimet intensive për zbardhjen dhe dokumentimin e gjithë detajeve të kësaj ngjarje të rëndë, që ka prekur dhe shokuar mbarë opinionin publik.
Përfitoj nga kjo dalje publike, t’u shpreh edhe njëherë ngushëllimet më të thella familjes së të ndjerit, miqve dhe kolegëve të tij. Komisioni Qendror i Statusit “Dëshmor i Atdheut” ka nisur procedurat për shpalljen e oficerit Saimir Hoxha, “Dëshmor i Atdheut” duke i garantuar familjes së tij të gjithë vëmendjen dhe mbështetjen e dhënë me ligj të posaçëm.
Po kështu me këtë rast, inkurajoj fort gjithë trupën e Policisë së Shtetit dhe i shpreh mbështetjen time të pakufishme, dhe në emër të qeverisë shqiptare, për të vijuar me vendosmëri betejën e përditshme me krimin, i çfarëdolloji qoftë ai.
Dua të shpreh vetëm respekt e mirënjohje për të rënin në krye të detyrës, me premtimin se nuk do të ndalim asnjë moment të vëmë para drejtësisë këdo që guxon të ngrejë dorën e krimit mbi Policinë.
Ngjarje si kjo e sotmja, vërtet krijojnë dhimbje dhe indinjatë në zemrën e çdo shqiptari, por kurrsesi nuk na zmbrapsin apo dekurajojnë në luftën kundër paligjshmërisë. As mua si Ministër i Brendshëm dhe as trupën e Policisë së Shtetit.
Faleminderit.
(E.H/Faxweb.al)
Discussion about this post