Ministri i Mirëqënies Sociale, Blendi Klosi, zhvilloi së fundmi një takim me në fokus punësimin e të rinjve shqiptarë në Administratën Publike.
Gjatë fjalës së tij, ai bëri të ditur se krahasuar me këtë program në 2015-ën, gjatë vitit të kaluar numri u dyfishua dhe pritet që në 2017-ën të ketë një tjetër rritje të dukshme të të rinjve që i besojnë Administratës Publike dhe duan të punojnë aty.
Teksa theksoi se bëhet fjalë për një program aspak partiak, ministri i Mirëqënies Sociale bëri me dije se gjatë vitit 2017, program do të zgjerohet duke bërë pjesë të tij edhe kompanitë private që do të mirëpresin të rinjtë, të cilët pas një praktike pune do të kenë mundësinë të nënshkruajnë edhe kontrata pune.
“Një vit më parë ishin rreth 2000 të rinj, nga të cilët 200 përfituan. Këtë vit ishin shumë më shumë të rinj me dëshirën për të punuar në Administratën Publike, shumë më shumë është rritur besimi i ndërsjelltë në administratën publike. Kemi bërë shumë mirë për praktikën edhe për të rinjtë e Diasporës. Shqiptarë të Diasporës aplikuan dhe u bënë pjesë të kësaj administrate.
Do të ketë 100 të punësuar në Administratën Publike të Kosovës. Dy vitet e para dëshmuan që ka qenë një program aspak partiak, që sot mbështeten nga një grup kompanish të orientuara drejt suksesit.
Do të firmosim hapjen e programit të ri, që ka në qendër të rinjtë e shkolluar në të gjithë vendet ku flitet shqip, të aplikojnë edhe në 15 kompani private së bashku me administratën. Do kërkojmë që numri të dyfishohet, të kemi mbi 5000 pozicione për të rinjtë, për të bërë praktika 3 mujore dhe më pas kontrata pune.”, është shprehur ndër të tjera ministri Klosi. (XH.A/SHUPLAKA)
Discussion about this post