352 gjoba janë vendosur nga policia rrugore sot për një afat kohor prej 60 minutash në të gjithë vendin. Kjo në sajë të operacionit “Blici Rrugor”, i cili është në 12 qarqet e vendit, në akset kryesore dhe zonat urbane. Aksioni ka si qëllim kontrollin për vendosjen e rripit të sigurimit dhe mospërdorimin e celularit gjatë drejtimit të mjetit.
Detaje:
Operacioni nisi në orën 11:30 dhe zgjati deri në orën 12:30, ndërsa u angazhuan rreth 580 punonjës policie në total, si dhe u ngritën e funksionuan 114 pika kontrolli në të gjithë vendin.
Prej orës 11:30 deri në orën 12:30 në të gjithë vendin, Policia Rrugore e mbështetur dhe nga Patrullat e Përgjithshme dhe Shqiponjat vendosën:
81 masa administrative për mosvendosje të rripit të sigurimit.
123 masa administrative për përdorim të celularit gjatë drejtimit të mjetit.
Si dhe 148 masa administrative për shkelje të tjera, si shpejtësi tej normave të lejuara, për mosvendosje të kaskës mbrojtëse etj.
Ndërkaq policia ka publikuar një video gjatë aksionit, ku një shofer furgoni ndalohet pasi ishte pa rrip por nuk bie dakord për gjobën. Ai i thotë efektivit të policisë që e ka ndaluar se ‘sapo hipi në makinë’. (J.V/Shuplaka)
Discussion about this post