Blindohet Tirana, 1500 forca policie në terren, në gatishmëri RENEA e FNSH, rrugët që do bllokohen

Për protestën e sotme të Partisë Demokratike e cila pritet të fillojë në orën 12:00 Policia e Shtetit ka hartuar një plan masash për të siguruar mbarëvajtjen e saj.

Sipas planit të policisë për ruajtjen e rendit dhe sigurisë gjatë protestës do të angazhohen rreth 1500 efektivë nga komisariatet e Tiranës, njësia Shqiponja, Forcat Operacionale dhe ato të Ndërhyrjes së Shpejtë. Po kështu policia me planin e saj gjatë mbarëvajtjes së protestës do iu kushtojë një rëndësi të veçantë edhe ruajtjes së institucioneve të rëndësisë së veçantë përgjatë bulevardit “Dëshmorët e Kombit”.

Një detaj që nuk duhet humbur është se  pjesë e kordonit të parë përballë kryeministrisë do të jenë edhe efektivet femra.  Po kështu edhe breda protestës policia do të inflitrojë agjentë për të marrë informacion. 

DETAJE:

Po ashtu në tarracat e Kryeministrisë dhe Kryesisë së Kuvendit do të ketë efektivë policie të cilët do të monitorojnë nga sipër çdo veprim. Pas Kryeministrisë dhe te Sheshi “Italia” do të stacionohen autoambulanca dhe zjarrfikëse, të cilat do të qëndrojnë në gatishmëri.
Policia do të bllokojë trafikun dhe do të ndalojë parkimin e mjeteve në rrugët ndërlidhëse me bulevardin “Dëshmorët e Kombit”. Një pjesë e policëve rrugorë do të jenë në akset paralele për të menaxhuar trafikun e rënduar që do të shkaktohet nga ky bllokim.

Po ashtu policia Rrugore nuk do të lejojë të futen në kryeqytet autobusët me protestues të cilët pritet që të vijnë nga rrethet, bën me dije BalkanWeb. Nga ana perëndimore autobusët do të lejohen të qarkullojnë deri tek pallati i sportit “Asllan Rusi”, më pas do të parkohen tek Sheshi Shqiponja, ndërsa nga ana lindore, autobusët do të lejohen të qarkullojnë deri tek Fakulteti Ekonomik.

RRUGËT QË DO BLLOKOHEN: 

Nga ora 07:00 deri në përfundim të protestës – Rrruga “Papa Gjon Pali II”, nga Sheshi “Italia” deri tek kryqëzimi në Bulevardin “Bajram Curri”.

Nga ora 11:30 deri në përfundim të protestës – Sheshi “Skënderbej”, Rruga “Myslym Shyri”, nga kryqëzimi me Rrugën “Ibrahim Rugova” deri tek Kryqëzimi me Bulevardin “Dëshmorët e Kombit” – Bulevardi “Dëshmorët e Kombit” deri tek Kryqëzimi me Rrugën “Ibrahim Rugova”, – Bulevardi “Bajram Curri” nga kryqëzimi me rrugën “Ibrahim Rugova”, deri tek kryqëzimi me rrugën e “Elbasanit”.(J.V/Shuplaka)