Gjatë fjalës së tij në foltoren e Kuvendit, ministri i Financave, Arben Ahmetaj ka komentuar debatin mes deputetit të LIBRA-s Ben Blushit dhe deputetit socialist, Erjon Braçe, duke bërë një krahasim futbolli.
“Debati mes tyre mu duk si një ndeshje mes Juventusit dhe një skuadre amatore”,- tha Ahmetaj, i cili, këshilloi më tej Blushin të ndante mendjen dhe të tregonte nëse përfaqësonte një forcë të majtë, pasi në realitet, siç tha Ahmentaj, ai përdor tezat e PD.
“Si mund të vish ti si i majtë këtu? Trego kujt i përket. Po kërkon vijë ndarëse mes të majtës? Ok, por në finale tento të vësh një vijë ndarëse mes teje, partisë tënde, ku e fut edhe PD se del me tezat e PD qoftë në goditjet që i bën qeverisë, qoftë në ekonomi”.
Ahmetaj më tej komentoi edhe protestën e opozitës, duke thënë se demokratët janë kthyer në vendin e krimit, aty ku para 6 vitesh kanë vrarë.
“Kanë ngritur një çadër, çadrën e vetmisë së madhe aty ku kanë vrarë, janë kthyer tek vendi i krimit, aty ftojnë qytetarët të tregojnë shqetësimet ndaj një qeverie që s’ka shkop magjik, por e bëjnë për t’ju shmangur reformës në drejtësi. Ne e kemi të qartë drejtimin, ka çadra majtas dhe djathtas, udhëkryqi ekziston vetëm për ata që janë të paqartë se reforma në drejtësi është shtyllë për drejtësinë”,- tha ai.
Në replikë, Ben Blushi i kujtoi Ahmetajt se nuk mund të mbrohet për 4 vjet duke përmendur Saliun. “Keni një argument kur mbroheni, ai është Saliu. Ju s’mund të mbroheni 4 vjet me Saliun, bën krahasime vetëm me Saliun”. (E.K/SHUPLAKA)
Discussion about this post