Edhe pse në Parlament tashmë janë konsumuar dy raundet e para për zgjedhjen e Presidentit të ri ende nga forcat politike nuk ka një emër konkret.
Mazhoranca e ka justifikuar këtë me faktin që kërkon t’i japë kohë opozitës që të japë edhe ajo konsensunsin e saj.
Nga ana tjetër Basha u përgjigj nga çadra se e vetmja ofertë që japin demokratët është zgjedhja e Presidentit me votë popullore.
Po ashtu Blushi ka qenë një nga deputetët e parë që ka firmosur në Kuvend një nismë për ndryshimin e procedurave të zgjdhjes së Presidentit.
Madje siç e risjell në vëmendje edhe sot ai ka propozuar edhe një peticion online për mbledhjen e firmave.
‘’FIRMOS PRESIDENT NGA POPULLI. Ne qershor të vitit të shkuar kam nisur një peticion on line për zgjedhjen e Presidentit nga Populli. Për pak javë peticioni u firmos nga më shumë se 10.000 njerëz duke e bërë një nga peticionet on line më të mbështetura në Shqipëri.
Sipas ligjit britanik cdo peticion me më shumë se 100.000 nënshkrime, duhet të merret në shqyrtim nga parlamenti. Meqë këto ditë jemi pa kandidat për President, ju ftoj të gjithëve ta votojmë dhe ta shpërndajmë peticionin e hapur ne faqen më të madhe të peticioneve në botë’’, shkruan sot Blushi. (E.K/SHUPLAKA)
