Për kryetarin e LIBRA-s, Ben Blushi, numërimi elektronik është plotësisht i mundshëm, ka kosto më të ulët, është më i sigurt.
I ftuar në emisionin “5 pyetje nga Babaramo”, Blushi dha mendimin e tij lidhur me këtë cështje, ku sqaroi se pavarësisht se është i mundshëm, votimi elektronik s’ka për t’u bërë.
“Administrimi elektronik është plotësisht i mundshëm, nuk them detyrimisht votim se koha po skadon dhe për shkak të kësaj s’ka për t’u bërë, por numërimi elektronik është plotësisht i mundshëm.
Një makinë që nuk e zë gjumi, nuk i hahet picë në drekë, nuk korruptohet se nuk i jep dot 50 mijë lekë apo 100 mijë lekë dhe t’i thuash pastaj do të bëj drejtor dogane.”, tha deputeti.
Sakaq, Blushi ka folur edhe për ngjarjen e “21 Janarit”, të cilën e konsideron si vrasje shtetërore.
“Unë besoj që 21 Janari ishte vrasje shtetërore, Saliu i vrau në pritë, shkeli ligjin dhe kodin, se i vrau kur po tërhiqeshin. Kjo qeveri ka blerë gjakun e tyre me para.
Ndoshta mund të fshihet qeveria se s’po bën drejtësi se sistemin e drejtësisë nuk e kontrolloka dot, por një nga gardistët e 21 janarit është sot kryetar i PS në Bulqizë, një nga njerëzit që u provua që ka qenë gardist aty, njëri prej tyre ka qëlluar, ky sot është kryetari i PS në Bulqizë, gjykata të detyron ta vësh në krye të PS? E dini pse? Se Rilindja s’ka asnjë normë. Sot kontrollon PS e Bulqizës, emërimet, industrinë e minierave dhe është drejtor i OSHEE lokale.”, deklaroi kreu i LIBRA-s. (D.D/Shuplaka)
