Kreu i LIBRAS, Ben Blushi shpreh qëndrimin e tij ndaj procesit të hapjes së negociatave për antarësimin e Shqipërisë në Bashkimin Europian.
Në një dalje publike Blushi theksoi se ka ardhur koha të pranohet se janë disa shqiptarë ata që po vonojnë Shqipërinë të anëtarësohet në BE.
“Fajtorët janë partitë dhe viktima është populli. Akoma më qesharake është të shikosh se vetingun, dikush e quan kriter dhe dikush e quan kusht, se dekriminalizmin dikush e quan kusht dhe dikush e quan kriter, se kanabizimin e vendit dikush e quan kriter të diktuar dikush e quan kusht të merituar, se zgjedhjet dhe mungesën e reformës zgjedhore dikush e konsideron si kriter dhe dikush kusht”, tha Blushi.
Sipas tij, për shtyrjen e procesit të vetingut, për kanabisin, kriminalizimin, korrupsionin, dhe për pasigurinë për zgjedhjet e vitit 2017 fajtorët janë në Shqipëri dhe arsyet janë në Tiranë. As në Bruksel dhe as në Berlin.
“Duhet ti japim Europës një arsye për të na besuar, gjë për të cilën deri tani kemi dështuar me sukses. Në Europë nuk shkon dot vetëm qeveria dhe nuk shkon dot klasa politike pa popullin”, u shpreh deputeti Blushi.
Sipas tij është e mundur që të përshpejtohet procesi i vetingut urgjentisht, mund të zbatohet ligji i dekriminalizmit rreptësisht dhe menjeherë mund të përsoset sistemi jonë zgjedhor duke kufizuar monopolin e partive mbi numërimin e votave dhe financimet e dyshimta dhe mund të zhduket kanabisi për shumë pak ditë.
“Nëse Këshilli Europian nuk përcakton një datë dhe hapja e negociatave shtyhet pas zgjedhjeve, natyrisht që do ta konsideroja një dështim që do shtynte për një afat të panjohur proçesin e integrimit duke ndikuar jo vetëm në përkeqësimin e klimës së brendshme politike por edhe në ekonomi dhe mbi të gjitha në besimin në rënie të shqiptarëve për të jetuar dhe punuar në Shqipëri. Besoj se është koha të merremi vesh për Europën.” – shton Blushi.
Fjalën e tij politikani e mbylli duke thënë se ne mund të na ndajnë pikëpamjet, por duhet të na bashkojë Shqipëria.
Discussion about this post