Deputeti Ben Blushi ka reaguar nga foltorja e Kuvendit lidhur me VKM-në e qeverisë për të dëmshpërblyer grevistët e Zharrëzës, të cilët prej disa ditësh e kishin zhvendosur protestën në Tiranë.
Ai ndan mendimin se Zharrëza nuk do të mbyllet me kaq, por do të përsëritet sërish përpara zgjedhjeve, si dhe do të ketë sërish tërmete.
Blushi akuzoi qeverinë se i bleu grevistët me taksat e shqiptarëve, ndërkohë që ata duhet të ishin shpërblyer nga “Bankers Petrolium”.
“Zharrëza nuk do mbyllet, i thashë qeverisë që duhet të bëjë gjithcka që banorët e zharrëzës të marrin atë që meritojnë. U ble frika me para taksash, me taksat e një infermieri në Vlorë, një pensionisti në mallakastër, inxhinieri në Tiranë.
Pse nuk kishte mundësi qeveria të detyronte Bankers të dëmshpërblente banorët e zharrëzës? Totalisht e padrejtë, tregon se sa e paaftë është kjo qeveri.
Sakrifica e tyre vlen të vlerësohet, leksion se si duhet të protestohet. Përmes një proteste të pastër. Shpresoj që qeveritë të mos mbrojnë më ata që nuk duhet të mbrohen. Kush na garanton se fëmijët nuk do pinë më ujë të ndotur?
Bankers përcakton sa i ndotur është ajri, cilësinë. Zharrëza do të përsëritet prapë përpara zgjedhjeve.”, u shpreh deputeti Blushi. (XH.A/SHUPLAKA)
Discussion about this post