Boçi: AMA nuk pyet për ligjin, licensa e fundit jepet me votim të thjeshtë

Anëtar në komisionin e Medias dhe deputet i Partisë Demokratike, Luçiano Boçio njofton se AMA- ka bërë gati vendimin për të hapur nesër votimin për dhënien e licensës së fundit numerike të mbetur.

Nëpërmjet një shkrimi të publikuar në rrjetet sociale, Boçi shprehet se ky autoritet nuk pyet as për ligj dhe as për rregullore.

Sipas deputetit, Autoriteti I Medias Audiovizive po i merr vendimet jo me shumicë të cilësuar, siç e kërkon ligji.

Statusi i plotë:

THELLOHET SKANDALI I AMA-s
AMA ka bërë gati vendimin, që do ta marrë nesër, në mbledhjen e rradhës, për të rihapur votimin për dhënien e licencës së fundit numerike të mbetur, ndonëse procesi ligjërisht konsiderohet i përfunduar. Madje kësaj here me votim të thjeshtë. Sipas saj janë konsumuar dy votime me shumicë të cilësuar, sipas Kodit të procedurave administrative dhe në votimin e tretë vendoset me shumicë të thjeshtë. Këtu “flinte dhe lepuri” i votimit ilegal që u bë paradisa ditësh, pra në konsumimin e votimit të dytë. Me datë 29 janar AMA do veprojë sipas këtij skenari me vendimmarrje me shumicë të thjeshtë.
Por Ligji 97/2013 në nenin 19/1b e përcakton qartë që licencat jepen nga AMA me shumicë të cilësuar. Ndërsa rregullorja në nenin 20/3 thekson se kundër vendimit të AMA-s palët i drejtohen gjykatës. 
AMA nuk pyet as për ligj e as për rregullore. Madje as për kuorum. 
Po i kujtoj AMA-s që ajo prej shumë kohësh nuk merrte vendime për shkak të kuorumit dhe akuzonte PD për vonesat e kalimit të miratimit të tre anëtarëve të AMA në Komisionin e Edukimit.
Me këtë vendim “koburja” e Ramës AMA plotëson “amanetin” e tij për të monopolizuar tregun mediatik dhe për t’ia “vënë në kokë” këtë kobure lirisë së mediave. (D.D/Shuplaka)