Është bojkotuar mësimi edhe në universitetin e Elbasanit “Aleksandër Xhuvani”, nën shembullin e studentëve të Universitetit të Tiranës, ata kanë braktisuar auditorët dhe kanë paralajmëruar se nuk do të tërhiqen nëse nuk plotësohen kërkesat e tyre.
“Janë të tjerë që e kanë nisur nismën dhe ka disa ditë që jemi në protestë, dhe kjo është një gjë e drejtë sepse jemi në universitet shtetëror studentët nuk kanë pse paguajnë për cdo provim, sepse prindërit tanë nuk janë të gjithë politikanë në pushtet që të kenë mjaftueshëm para që të sponsorizojnë studimet tona ndërkohë që jemi 2 fëmijë në shkollë. Sikur vetëm tarifat të paguajmë, sërish shpenzimet janë të papërballueshme. Universiteti jonë e ka 250 mijë lekë. Fakultete të tjerë e kanë rreth 300 logarit shpenzimet e tjera që ju duhen”, tha njëra nga studentet e universitetit të Elbasanit.
Ndërkohë studentët janë shprehur se qeveria po e kthen arsimin e lartë publik në biznes, ndaj bëjnë thirrje që ajo të tërhiqet sa më parë pasi protestat e tyre nuk do të ndalen.
Ndërkohë në Tiranë studentët i kanë drejtuar 3 kërkesa Ministrisë së Arsimit, dhe kanë kërkuar përgjgije brenda ditës.
Nga ana tjetër Ministria e Arsimit në një njoftim të shpërndarë për mediat ka bërë të ditur se ministrja Nikolla do të dalë në një konferencë në orën 12:30.
Studentët e Fakultetit të Inxhinierisë së Ndërtimit dhe Fakultetit të Arkitekturës dhe Urbanistikës janë sot në ditën e dytë të protestës. Ato kanë bojkotuar sërish mësimin pasi janë kundër tarifës për provimet që jepen me kredite.
Nëse nuk merren parasysh kërkesat e tyre ata kanë bërë thirrje për revulucion studentor “Revolucion studentor. Revolucion studentor, revolucion studentor, ne nuk jemi bankomat, nuk tërhiqemi’. ” Jo negociata me ministren arrogante dhe injorante”, janë dëgjuar të thërrasin studentët.
“Dilni jashtë” “Duam ministren”, ”Anulo vendimin”, “Mbani përgjegjësi”, janë disa nga thirrjet e studentëve drejtuar Ministrisë së Arsimit.
Ata kërkojne gjithashtu që pagesa e tarifës së shkollës të kryet në muajin janar, ashtu si për çdo vit tjetër dhe jo në muajin dhjetor.
Studentët të cilët janë vetëorganizuar, kanë bojkotuar mësimin pasi kërkojnë plotësimin e tre pikave:
1. Heqjen e pagesës për kredite të provimeve të mbartura
2.Shtyrjen e afatit të pagesës vjetore
3.Bërjen e pagesës me këste
“Lëvizja Për Universitetin dhe aktivistë të saj i janë bashkuar dhe solidarizohen me kërkesat e tyre, pasi universiteti duhet të jetë në bazë të meritës dhe jo parave. Universiteti banohet nga studentët, prandaj studentët duhet të vendosin!“- shkruhet në njoftimin e Lëvizjes për Universitetin.
(B.H/Faxweb)
