Deklarata e këshilltarit për Siguri Kombëtare në Shtëpinë e Bardhë, John Bolton I cili tha se SHBA nuk përjashtonte “korrigjimin e kufijve” mes Kosovës dhe Serbisë ka shkaktuar jo pak shqetësime.
Përmes një postimi në ‘Facebook’ gazetari Berat Buzhala thotë se Bolton është kundërshtar i egër i pavarëisë së Kosovës, ndërsa ka shtuar se e gjithë skena politike duhet të izolojë presidentin e Kosovës Hashim Thaçin.
Sipas tij prapa kësaj ideje qëndron plani serb që të hapet edhe njëherë çështja e Kosovës.
“John Bolton, kundershtar i eger i pavaresise se Kosoves, aleat i Serbise ne Shtepi te Bardhe, thote qe SHBA nuk do ta kundershtoje idene e shkembimit te territoreve.
Prandaj e gjithe skena politike ne Kosove duhet me e izolu Presidentin Thaci. Duhet me ia sabotu idene e tij per korrigjim kufijsh. Kjo eshte ide nacionaliste serbe.
Prapa kesaj ideje qendron plani serb qe te hapet edhe njehere ceshtja e Kosoves dhe statusi i saj per debat nderkombetar.
Eshte cmenduri me i shku pas Thacit. Kushdo. Madje edhe keshilltaret e tij”, – shkruan Buzhala.
Ndërkohë që ende nuk kemi një reagim rreth krerëve të shtetit të Kosovës rreth deklaratës së Bolton, ka qenë kryetari i Komunës së Prishtinës Shpend Ahmeti I cili përmes një postimi në rrjetet sociale ka thënë se kjo deklaratë është një tregues se SHBA-të kanë ndryshuar qëndrim rreth dialogut Kosovë-Serbi. Sipas tij Kuvendi duhet të mblidhet menjëherë.
“Deklarata e këshilltarit për Siguri Kombëtare e Presidentit të ShBA se ata nuk do të pengojnë shkëmbimin e territoreve në qoftë se pajtohen Serbia dhe Kosova është tashmë dëshmi se qëndrimi amerikan për dialogun dhe zgjidhjen Kosovë-Serbi ka ndryshu”, ka shkruar Ahmeti në Facebook.
“Nuk duhet të lejohet as edhe një takim i palëve pa u taku Kuvendi dhe pa diskutu platformë e ekip negociator. Por, Kuvendi i Kosovës ende në pushim!” – ka shkruan Ahmeti. (B.H/Faxweb)
Discussion about this post