Pak pas mesnatës, një breshëri bombash përfshiu jugun e Bejrutit, Dahieh, duke rrafshuar të paktën tre pallate me një shpërthim që i kujton të gjithëve vrasjen e Nasrallahut, liderit të Hezbollahut. Këtë herë, objektivi i izraelitëve ishte zëvendësi i tij dhe pasardhësi i mundshëm, Hashem Saffiedine, 60 vjeç, një klerik shiit i afërt me Iranin për lidhjet ideologjike dhe të gjakut: djali i tij është i martuar me vajzën e gjeneralit iranian Soleimani, i vrarë nga amerikanët. Një natë tjetër terrori për libanezët, të cilët u zgjuan mëngjesin nga lajmi se një sulm ajror izraelit kishte vrarë nëntë persona në Bachoura, një tjetër lagje shiite në qendër, më pak se 900 metra nga zyra e kryeministrit në Grand Serail, selia e qeverisë libaneze.
Një fazë e re
Lufta po i afrohet pashmangshmërisht zemrës së kryeqytetit, i cili këto ditë është ‘pushtuar’ nga një fluks refugjatësh të paparë. Ofensiva izraelite ka hyrë në një fazë të re, me dy objektiva: të zgjerojë fushatën ushtarake kundër Hezbollahut dhe të zbrazë Jugun e vendit, duke shtyrë popullsinë shumë më në veri të lumit Litani, që është vija politike e treguar nga rezoluta 1701 e Kombeve të Bashkuara për një zonë të demilitarizuar “tampon” me Izraelin.
Të zhvendosurit
Bachoura është një lagje shiite ku sundon Amal, aleati i Hezbollahut në Parlament, por edhe partia e Nabih Berrit, veteranit të politikës libaneze që është pozicionuar për një armëpushim së bashku me kryeministrin Miqati. Objektivi i sulmit ishte selia e “Komitetit Islamik të Shëndetësisë”, një nga shumë shoqatat e lidhura me Hezbollahun që menaxhon një rrjet të gjerë organizatash sociale dhe civile në kryeqytet dhe në të gjithë Jugun.
Në Bachoura, ashtu si në lagje të tjera, janë vendosur një pjesë e të zhvendosurve nga Dahieh dhe Jugu; qindra flenë në rrugë mbi shtretër me batanije dhe kartonë, të tjerë janë strehuar në shkolla të shndërruara në strehime falë rrjeteve të partive dhe bashkëpunimit ndërkombëtar. Fluksi ka përmbysur papritur demografinë politike të Bejrutit, e cila është një përzierje e brishtë komunitetesh dhe sektesh, secila me partinë dhe lagjen e saj përfaqësuese. Mbizotëron solidariteti, por ka frikë se me përkeqësimin e luftës dhe të emergjencës humanitare, tensionet sektare mund të shpërthejnë.
Në lagjen e Nasrallahut
Dahieh, bastioni i Hezbollahut, prej ditësh është nën sulm. Dje ushtria izraelite njoftoi se kishte goditur selinë e Inteligjencës së Hezbollahut dhe një strukturë tjetër pranë rrugës që të çon në aeroport. Në 48 orët e mëparshme, izraelitët kishin kryer dy sulme të rëndësishme në Siri. Në Damask, është vrarë dhëndri i Nasrallahut dhe në Latakia është goditur një depo municionesh pranë bazës së Khmeimim, e kontrolluar nga rusët. “Qëllimi është bllokimi ushtarak i Hezbollahut, ndërprerja e zinxhirit të furnizimit në mënyrë që të mos vijnë armë dhe municione nga Siria dhe rritja e presionit mbi luftëtarët,” tha një burim pranë Hezbollahut për La Repubblica.
Pas urdhrit të parë për evakuimin e 28 fshatrave të Jugut, dje IDF-ja i urdhëroi banorët e 25 fshatrave të tjerë të linin shtëpitë e tyre, duke përfshirë qytetin Nabatieh, një nga më të mëdhenjtë e Jugut, që ishte zbrazur pjesërisht në javët e fundit. Kjo sugjeron se bombardimet në Libanin Jugor do të intensifikohen ndërsa trupat tokësore përpiqen të thyejnë kufirin: ka përleshje të përgjakshme midis IDF-së dhe luftëtarëve shiitë, të cilët pretendojnë vrasjen e 17 ushtarëve, ndërsa izraelitët flasin për rreth 100 milicë të eliminuar në dy ditë, informacione që Repubblica nuk ka mundur t’i verifikojë në mënyrë të pavarur. Dje, edhe ushtria libaneze tha se kishte kthyer zjarr kundër forcave izraelite pasi një nga ushtarët e saj u vra në një sulm, diçka që nuk kishte ndodhur kurrë më parë. Që nga tetori i kaluar, në Liban kanë humbur jetën 1.974 persona, përfshirë 127 fëmijë dhe shumë janë të zhdukur./ La Repubblica
Discussion about this post