Kryeministri britanik Boris Johnson vizitoi pjesën veriore të Anglisë të shtunën për takime me ligjvënësit e sapozgjedhur të Partisë Konvervatore, zonë që njihet edhe si zemra e klasës punëtore që i ktheu shpinën Partisë Laburiste duke kontribuar në fitoren e zotit Johnson.
Pas fitores historike, Johnson është i vendosur që të fillojë javën që vjen procesin për daljen e Britanisë nga Bashkimi Evropian deri në afatin e caktuar me 31 janar. Kryeministri Johnson shprehu mirënjohje për besimin që pjesa veriore e vendit i dha atij përmes votës.
“Dua që populli i pjesës Verilindore ta dijë që konservatorët e vlerësojnë besimin që na keni dhënë. Si kryeministër do të bëj gjithçka që të reflektojë besimin tuaj. …. A do të realizojmë Brexit-in? A e mbështesni këtë marrëveshje?”, tha Johnson.
Pasi të kapërcejë pengesën tre vjeçare në parlament, Kryeministri Johnson duhet të sigurojë një marrëveshje tregtare me Bashkimin Evropian deri nga fundi i vitit 2020.
Discussion about this post