Gjatë ditës së djeshme në mediat online dhe rrjetet sociale, u shpërnda një shkëmbim mesazhesh mes kreut të Urgjencës kombëtare Skënder Brataj, sipas të cilavë ky i fundit porosiste të gjithë mjekët dhe infermierët e urgjencës kombëtare që të vizitojnë profilin e tij në Facebook dhe të japin “like”.
Porosia nuk ishte vetëm për ta, por edhe për familjarët e tyre, ndërsa kujdesej që mesazhi të shkojë tek të besuarit në mënyrë që të mos “rridhnin”. Por pak para mesnatës, vetë Brataj ka dalë në një lidhje live në rrjetet sociale dhe ka njoftuar se mesazhet e shpërndara janë montazh dhe nuk janë të tijat.
Brataj i quajti këto sulme të ulëta që i bëhen figurës dhe punës së tij, ndërsa shtoi se nuk ka asnjë interes që të rrisë numrin e likeve, sa kohë që është çdo ditë në media, dhe ka akses te të gjithë shqiptarët përmes daljeve të tij.
“Nuk e kam bërë kurrë, se po ta bëja një gjë të tillë, nuk do dilja para njerëzve që të justifikohesha, se nuk kisha përse. Përse më duhen mua like në këtë moment të sëmundëshmërisë që jemi? Kam pasur aq shumë vizibilitet në media, nuk e di se pse duhet të më duheshin më liket. Në denoncimet që bëra për disa persona shumë prej miqve më thanë që të mos ulesha në nivelin e tyre.
Nuk jam marrë ndonjëherë me politikë derimë tani, jam mjek urgjence që nga nisja e karrierës sime deri tani, dhe di ta bëj atë punë. Ju lutem na lini që të punojmë, si është e mundur që të akuzohesh në mes të ditës, nga mediat, të një mesazhi që nuk ka emër”, tha Brataj, që kërkoi nisjen e hetimeve për këto mesazhe që sipas tij janë montazh.
Më tej ai shtoi se iu kërkon çdo mjeku ose infermieri që nëse kanë mesazhe me të ti bëjnë publike. “Ka dy muaj që jam nëpër media, dhe nëpër network, nuk e di se pse duhet të bija kaq poshtë, që të kërkoja një gjë të tillë.”, tha më tej Brataj. (E.K/Faxweb.al)
Discussion about this post