“Bread & Heart” Festival bashkoi në Tiranë në edicionin e tij të parë mbi 150 arkitektë të mirënjohur ndërkombëtarë nga Europa, Azia, Amerika Veriore e Jugore, të cilët punojnë në Shqipëri, së bashku me partnerët e tyre lokalë.
Kryeministri Edi Rama ndau sot në rrjetet sociale një videokartolinë të edicionit të parë të Festivalit Ndërkombëtar “Bread&Heart”, që mblodhi në Tiranë ajkën e arkitektëve të botës.
Rama tha se ecuria e Shqipërisë, sfidat e planifikimit, ndërtimit, mbrojtjes së natyrës ishin në fokus të këtij eventi të rëndësishëm.
“Ata zhvilluan një ditë të hapur diskutimesh publike dhe një ditë të mbyllur diskutimesh teknike, për ecurinë e Shqipërisë, sfidat e planifikimit, ndërtimit, mbrojtjes së natyrës, edukimit e të tjera me radhë, në një format unikal bashkëpunimi ku u përfshinë edhe profesionistë të ftuar nga vetë arkitektët për të ndarë eksperiencat e tyre në fushat e Inteligjencës Artificiale, arkitekturës së pejzazhit, transportit, dizajnit të brendshëm e me radhë”, tha Rama.
Në fjalën e mbajtur në këtë event, kryeministri Rama u shpreh se “ky festival nuk ka të bëjë me arkitekturën si profesion, ka të bëjë me arkitekturën si aktin më të afërt njerëzor, më të afërmin drejt hyjnores”.
“Të krijosh hapësira ku e vërteta mund të rritet dhe të mbrojë veten, ku nevoja jonë e lashtë për të përkitur, për të lidhur, për të lenë një shenjë të bëhet diçka që ndajmë të gjithë”, shtoi ai.
Ky festival e fut Shqipërinë në një tjetër hartë prestigjoze të Europës, duke krijuar premisat që në të ardhmen, “Bread & Heart” Festival të kthehet në një eveniment prestigjoz global, me arkitekturën në qendër, por me një perimetër gjithnjë e më të gjerë disiplinash të përfshira në debat.
