Deputetja e djathtë Majlinda Bregu ka thënë sot në një konferencë se kreut demokrat Basha i mbaron mandati si kryetar i Partisë Demokratike më 22 korrik.
Sipas Bregut, mbarimi i mandatit të Bashës duhet të sjellë zgjedhje në Partinë Demokratike për kryetarin e saj.
“Në 22 korrik mbaron mandati i Bashës në PD. Duhet të bëhen zgjedhje për kryetarin”,- deklaroi deputetja e PD-së.
Sipas Bregut, Partia Demokratike mund të vijë në pushtet vetëm përmes zgjedhjeve.
“Nuk di rrugë më të mirë të të bërit politikë sesa pjesëmarrja në zgjedhje. E kam bindje politike dhe sidomos PD-ja, nuk ka asnjë shans tjetër për të ardhur në pushtet përveç pjesëmarrjes në zgjedhje. Unë politikën e di institucionale, me gjithë respektin për revolucionet, lëvizjet, grupimet”,- mësohet të ketë thënë Bregu, shkruan Mapo.
E pyetur nëse do të ketë fatin e Ben Blushit, i cili u largua nga PS-ja për të formuar një parti tjetër, apo edhe Mesila Dodës, të cilën e përjashtuan nga PD-ja para se t’i bashkohej partisë së çamëve, PDIU, Bregu tha se ajo ka qenë dhe do jetë gjithmonë pjesë e PD-së pavarësisht kritikave.
“Unë kam qenë, jam dhe do të jem pjesë e PD-së. Largimi nga një forcë politike nuk është asnjëherë i lehtë”,- tha Bregu. (M.D/Shuplaka)
Discussion about this post