Deputetja e Partisë Demokratike, Majlinda Bregu në një intervistë për Zërin e Amerikës ka folur edhe për protestën e 18 shkurtit. “Uroj që protesta të mos mbarojë në datë 18, po të ngrejë çështje që qytetarët i kanë paraprirë edhe më mirë se opozita”.
Deputetja komentoi edhe ndër të tjera akuzuat që i janë bërë ambasadorit të SHBA-ve Donald Lu, në punët e brendshme të institucioneve shqiptare, siç ishte rasti i Kryeprokurorit Adriatik Llalla i cili deklaroi publikisht se ndjehej i shantazhuar prej tij.
“Unë mendoj se ambasadorët e huaj janë shumë të përfshirë në çështjet tona se i kemi lënë ne, pasi kemi dyshime tek njeri-tjetri dhe mungesë konsensusi. Kjo i lë vend edhe hapësirë atyre. I kemi konsideruar gjithnjë si ndërmjetës për të na bërë të flasim me njëri-tjetrin. Pastaj këto filmat me diversantë dhe që na duan të keqen nuk i besoj”,- tha Bregu duke lënë të nënkuptohet se ndërhyrja e një diplomati të huaj duhet të jetë më e vogël.
Sipas Bregut qeveria nuk e ka vënë ujin në zjarr për zbatimin e rekomandimeve të OSBE/ODIHR dhe duhet të japë garanci që nuk do preket vota e shqiptarëve në zgjedhjet e ardhshme. (J.V/Shuplaka)
Discussion about this post