Brenda 48 orë kishte vjedhur në 12 makina duke u thyer xhamat, arrestohet 29-vjeçari

Policia ka vënë në pranga një 29-vjeçar, i cili dyshohet se ka vjedhur në 12 automjete që iu ka thyer xhamat.

Sipas policisë, 29-vjeçari , vetëm mbrëmjen e djeshme, ka vjedhur sende personale në 6 automjet që iu ka thyer xhamat, në një vendparkim, në Astir.

Njoftimi i policisë:

Finalizohet nga Komisariati i Policisë Nr. 6, operacioni policor i koduar “The End”.

Vidhte para dhe sende personale nga automjetet, pasi iu thyente xhamat, kapet dhe vihet në pranga 29-vjeçari.

Gjatë 48 orëve të fundit, ky shtetas dyshohet se ka vjedhur në 12 automjete që iu ka thyer xhamat.

Shërbimet e Komisariatit të Policisë Nr. 6, pas denoncimeve nga disa drejtues automjetesh, për vjedhjen e sendeve personale nga automjetet e tyre, pas thyerjes së xhamave, bazuar dhe në inteligjencën informative, organizuan dhe finalizuan operacionin policor të koduar “The End”.

Në kuadër të operacionit, u kap dhe u arrestua shtetasi E. N., 29 vjeç, banues në Tepelenë.

Nga veprimet hetimore dyshohet se ky shtetas, mbrëmjen e djeshme, ka vjedhur sende personale në 6 automjet që iu ka thyer xhamat, në një vendparkim, në Astir. Gjithashtu, gjatë 48 orëve të fundit, në lagje të ndryshme të Tiranës, ka vjedhur sende të ndryshme në 6 automjete, pasi ka thyer xhamat e tyre, me sende të forta.

Vijojnë hetimet për zbardhjen e vjedhjeve të tjera që mund të ketë kryer ky shtetas.

Materialet procedurale i kaluan Prokurorisë, për veprime të mëtejshme.