Kryeministri Edi Rama premtoi për vitin 2020 se familjet e prekura nga tërmeti që jetojnë në çadra do të kalojnë në shtëpitë e reja brenda marsit. Gjatë një videomesazhi në “Facebook” për të bërë bilancin e vitit që po lemë pas e për të uruar shqiptarët për vitn e ri, Rama u shpreh se 2020 do t’iu përkushtohet rindërtimit dhe familjeve që u dëmtuan nga tërmeti.
“Objektivi është që brenda 2020, të gjitha ata që jetojnë në fshat, që për arsye legjitime nuk janë spostuar në zonat urbane, dhe thjesht kanë kërkuar një çadër duhet të futen në shtëpinë e tyre të re. Asnjë nuk do ta lëmë të kalojë vitin e ri 2021 në çadër, ky është objektivi i parë.
Besoj se ne do të jemi gati, që me fillimin e pranverës, maksimalisht marsin, të bëjmë spostimin e familjeve që jetojnë në fshat nga çadrat në shtëpitë e reja”, u shpreh Edi Rama.
Sipas kryeministrit, gjatë vitit të ardhshëm do të bëhet i mundur edhe riparimi i spitaleve dhe shkollave të dëmtuar. Ndërsa për Spitalin e Laçit premtoi ndërtimin nga e para.
“Spitalet, shkollat duhet të riparohen brenda disa muajsh. Lagjet e reja, ambicia është se brenda 5-6 mujorit të parë t’i kemi në kantier, kjo kërkon shumë kohë, sepse kërkohet ndërhyrja masive. Duhet filluar meremetimi për pallatet e banimit, por më një ekzigjencë për të rregulluar eurokodet, ky është meremetim që bëhet me shpenzimet e vetë kompanive.
Për famijet e varfëra, apo shtresën e mesme, që ka humbur shtëpinë nga tërmeti ne u garantojmë kushte më të mira nga ato që kishin. Tërmeti ka goditur familjet e varfra dhe familjet me të ardhura modeste. Spitalit i Laçit, një godinë tani e amortizuar do të jetë më cilësore, më e sigurt, më dinjtoze, sepse do të ndërtohet nga e para dhe do të garantohen kushte shumë më të miria se ato që ishin më parë”, tha kryeministri Edi Rama.
(M. I./ Faxweb.al)
Discussion about this post