Bufon bëri shqiponjën me Shakohoxhën, tërbohen serbët. Ja çfarë shkruajnë (FOTO)

“Portieri i Juventusit, Xhanluixhi Bufon, është pa dyshim mjaft popullor në mbarë botën, por në të ardhmen nuk do të ketë simpati të madhe nga serbët. Pas ndeshjes me Shqipërinë, portieri i kombëtares italiane bëri me dorë shqiponjën dykrenore, simbolin e ‘Shqipërisë së Madhe’. Legjenda nga Torino e bëri këtë së bashku me gazetarin Dritan Shakohoxha, i cili vazhdimisht poston foto të kriminelit Ramush Haradinaj”, shkruan “Kurir”.

Më herët, mediat serbe kryqëzuan edhe kampionin e Europës në garën e kërcimit së gjati, shqiptarin Izmir Smajlaj, i cila pas fitores ka bërë me duar shqiponjën.

“Shqiptari Izmir Smajlaj çuditërisht mori medaljen e artë në kërcim së gjati në Kampionatin Evropian në Beograd, ndërsa më vonë i paprovokuar provokoi publikun korrekte në “Arena” e cila e përshëndeti atë me duartrokitje”, shkruanin mediat serbe.

Kombëtarja nuk ia doli. Italia na mundi 2-0 në ndeshjen e pestë për kualifikueset e Kampionatit Botëror “Rusi 2018”.

Në “Renzo Barbera” të Palermos, kuqezinjtë u ndëshkuan me nga një gol në çdo pjesë në një ndeshje ku loja ishte mbi nivelin e dy paraqitjeve paraardhëse kundër Spanjës dhe Izraelit.

De Rosi mposhti Strakoshën me një penallti në minutën e 12-të, pasi skuadra jonë kishte shpërdoruar dy raste në fillimin e lojës.

Në pjesën e dytë (71′), pasi loja u ndërpre për 14 minuta pasi tifozët shqiptarë hodhën shashka dhe tymuese, Imobile vulosi suksesin e të kaltërve.

Për Shqipërinë kjo është disfata e tretë radhazi dhe kuqezinjtë mbeten të katërtët në Grupin G me 6 pikë, pas Spanjës dhe Italisë që udhëheqin me nga 13 dhe Izraelit që ka 9.

Pikërisht këta të fundit do të jenë kundërshtari i radhës i kuqezinjve më 11 qershor në Tel Aviv.

 (M.D/ Shuplaka)