Presidenti i Republikës Bujar Nishani, i ftuar në emisionin “Kjo Javë” të gazetares Nisida Tufa, shprehet i gatshëm për një mandat të dytë.
“Unë kam shprehur gatishmërinë time për të vazhduar detyrën. Pse? Së pari, e ndjej veten në kapacitet të plotë për të përmbushur detyrën. Besoj që vijimi i punës do jetë më i mirë për shkak të eksperiencës. Ashtu si dhe mendoj dhe besoj se e kam kryer duke përmbushur tre elementë: seriozitetin, dinjitetin dhe thjeshtësinë. Këto parime i kam përkthyer në tre kolona dhe besoj që i kam realizuar si objektiva.”, shprehet presidenti.
Ndër të tjera Nishani tregon se ekziston edhe një mundësi që vendin e tij, pas 24 korrikut ta marrë kreu i Kuvendit Ilir Meta.
“Mandati mbaron më 24 korrik të këtij viti. Pavarësisht se unë jam zgjedhur President 11 qershor të vitit 2012, unë jam bërë President ditën që jam betuar, më 24 korrik të 2012-s kur mbaroi mandati i Presidentit paraardhës. Qëllon për herë të parë që zgjedhja përkon me zgjedhjet parlamentare. Ky rast është parashikuar në Kushtetutën e vendit dhe me ligjin përkatës ku thuhet se në momentin kur Presidenti zgjidhet në të njëjtin moment me parlamentin, Presidentin e zgjedh parlamenti që shpërndahet.
Pra parlamenti aktual ka të drejtën nëse arrin të zgjedhë Presidentin e ri të vendit. Nëse nuk zgjidhet Presidenti nuk provokohet një krizë politike, pasi e vetmja krizë që mund të provokohet janë zgjedhjet e parakohshme. Por në këtë rast ne kemi zgjedhje. Paralamenti duhet të llogarisë 5 javë para se të shpërndahet. Duhet të llogaritet afati i fushatës elektorale, më pas Parlamenti llogarit ditën e shpërndarjes, dhe më pas 5 raunde në të cilat zgjidhet Presidenti. Nëse nuk zgjidhet në këtë rast, atëherë pas 24 korrikut kompetencat e Presidentit i kalojnë kryetarit të Kuvendit të Shqipërisë, deri sa të zgjidhet Presidenti i ri i vendit. Nuk do ketë ngërç politik.”, tregon Nishani. (D.D/Shuplaka)
Discussion about this post