Komisioni Evropian i ka dhënë dritën jeshile Bullgarisë për t’u anëtarësuar në eurozonë duke përcaktuar datën 1 janar 2026 si afatin e planifikuar për adoptimin e monedhës së përbashkët evropiane. Vendimi u mor më 4 qershor dhe vjen pas një vlerësimi pozitiv nga Komisioni se Bullgaria i përmbush katër kriteret nominale të konvergjencës që nevojiten për hyrjen në eurozonë. Këto kritere përfshijnë stabilitetin e çmimeve, pozitat e shëndosha fiskale, qëndrueshmërinë e kursit të këmbimit dhe normat e interesit afatgjatë në nivel të krahasueshëm me vendet e eurozonës.
Presidentja e Komisionit Evropian Ursula von der Leyen deklaroi se euroja është një simbol i prekshëm i forcës dhe unitetit evropian duke nënvizuar rëndësinë politike dhe ekonomike të këtij hapi për Bullgarinë. Në të njëjtën ditë pritet që edhe Banka Qendrore Evropiane të publikojë vlerësimin e saj lidhur me përgatitjet e Bullgarisë për adoptimin e euros dhe zyrtarët bullgarë janë optimistë se edhe ky institucion do të japë një opinion pozitiv.
Vendimi përfundimtar për pranimin e Bullgarisë në eurozonë do të merret nga Këshilli i Bashkimit Evropian i cili do të bazohet në vlerësimet e Komisionit Evropian dhe të Bankës Qendrore Evropiane si dhe në diskutimet që do të zhvillohen në kuadër të Eurogrupit dhe Këshillit Evropian. Edhe pse përdorimi i euros ishte ndër objektivat e anëtarësimit të Bullgarisë në BE rrugëtimi drejt adoptimit të saj është vonuar për shkak të sfidave të brendshme si bllokadat politike shtatë zgjedhjet parlamentare brenda katër vitesh, moszbatimi i disa reformave kyçe dhe shqetësimet për inflacionin dhe pastrimin e parave.
Megjithatë njoftimi i sotëm përbën hapin e dytë të rëndësishëm të Bullgarisë drejt integrimit të plotë evropian brenda një viti pasi në janar të këtij viti vendi u bë anëtar me të drejta të plota i zonës Shengen duke hapur kufijtë tokësorë me Greqinë dhe Rumaninë. Adopimi i euros në vitin 2026 do të shënojë një etapë historike për Bullgarinë duke e afruar më shumë me strukturat ekonomike dhe politike të bllokut evropian.
