Një minator 40-vjeçar është plagosur gjatë punës në një nga galeritë e kromit të kompanisë “ACR” në minierën e Bulqizës. Sipas burimeve, ai është goditur nga një masiv gurësh teksa ndodhej në thellësi të tokës.
I plagosuri, me inicialet A.N., u dërgua fillimisht në spitalin bashkiak të Bulqizës, ku mori ndihmën e parë, për t’u transferuar më pas në Spitalin Rajonal të Dibrës (Peshkopi) për një trajtim më të specializuar. Mjekët kanë konfirmuar se gjendja e tij është jashtë rrezikut për jetën.
Për ngjarjen nuk ka ende asnjë deklaratë zyrtare nga Policia e Shtetit apo institucionet përkatëse. Raste të tilla raportohen rrallë publikisht, edhe pse aksidentet në minierat e vendit janë të shpeshta dhe shpesh përfundojnë me pasoja tragjike.
Vetëm dy ditë më parë, një tjetër minator humbi jetën në një galeri kromi në Përrenjas, ndërsa edhe në minierën e Bulqizës, çdo vit raportohen plagosje dhe humbje jetësh, duke ngritur shqetësime serioze për kushtet e sigurisë në punë.
