Një 23-vjeçare shqiptare, identiteti i së cilës nuk bëhet i ditur, por emri i saj i mbrojtur është Fatime, ka rrëfyer tmerrin që i është dashur të përjetojë nga bashkëshorti i saj dhe familja e tij.
E ngujuar prej tetë muajsh në banesën në Kantonin e Tiçinos në Itali, shqiptarja nga Kosova, tregon se nuk lejohej të dilte nga pragu i shtëpisë, pasi i shoqi dhe familja e tij gardiane kishin frikë se mos ikte.
“Ata më përgjonin ditë e natë. Nuk guxoja të dilja e vetme as për të blerë dhe as për ta shoqëruar vajzën në parkun e lodrave, menjëherë mbrapa banesës”, ka rrëfyer Fatimja, transmeton “albinfo.ch”.
Ajo shpjegon se martesën e kishin rregulluar familjet dhe bashkëshortin e kishte parë vetëm një herë, ndërkohë që situtata pas lindjes së vajzës së tyre u përkeqësua.
“Përnjëherë bashkëshorti im u bë njeri krejtësisht tjetër, gjaknxehtë dhe i dhunshëm.”, është shprehur Fatimja.
E gjendur në udhëkryq, ajo ka rrëfyer se guxoi të arratiset bashkë me të bijën, pavarësisht frikës nga familjarët:
“Pas shumë përpjekjeve për të ikur, unë një ditë e mora vajzën dhe ikëm bashkë me të. Nuk kisha asgjë me vete përveç karrocës së fëmijëve. Nuk e dija italishten dhe nuk e njihja as qytetin ku jetoja”.
Tanimë, ajo jeton në liri, por me frikën e hakmarrjes së familjes të bashkëshortit, e cila e ka kërcënuar me vdekje. (XH.A/SHUPLAKA)
Discussion about this post