Bujqit por jo vetëm ata, edhe sipërmarrës e qytetarë do të duhet të mësohen tani e tutje me një sistem të ri të vendosjes së çmimit referencial dhe shkëmbimit të produkteve bujqësore. E gjitha ka të bëjë me bursën bujqësore.
Sigurisht që hapi i parë do të jetë ai i vendosjes së çmimit referencial, siç edhe e theksoi sot ministri i Bujqësisë Edmond Panariti.
Ministri thotë se platforma për Bursen Bujqësore do të vendosë çmimin fillestar, si një mekanizëm që shërben për dakordësimin e çmimit mes palëve. Fillimisht do të percaktohen çmimet e dakordësuara mbi bazën e ankandit, që do të jenë çmimet e referencës dhe qe nuk mund të jenë poshtë kostos së prodhimit.
“Çmimi referencial është vetëm hapi i parë drejt Bursës Bujqësore që do të jetë edhe mekanizmi rregullator i tregut bujqësor në të ardhmen. Ky çmim do të orientojë fermerët në çmimet e shitjes, blerjes dhe eksportet”, tha ai.
Ministri Panariti theksoi gjithashtu se një faktor shumë i rëndësishëm është edhe mbrojtja e konsumatorit nga abuzimi me çmimin.
“Çdo konsumator duhet ta dijë dhe nëpërmjet kësaj platforme mund të orientohet, se sa është sot në Lushnjë apo në një rreth tjetër çmimi i një produkti dhe ai të mos e blejë atë në një treg apo tezgë me 10 fishin e çmimit”, shpjegoi Panariti.
