Gazetari Andi Bushati nëpërmjet një shkrimi në “Lapsi.al” ka theksuar se debati i hapur nga kryeministri Edi Rama me Greqinë po frymëzon një sherrr pa thelb që e bën të duket bukur përballë pasqyrës së ekstremistëve.
Bushati thekson se, kreu i qeverisë nuk duhet marrë seriozisht pasi debatin e vërtetë e ka me nacionalistët e paditur dhe në këtë mënyrë po kërkon të dalë triumfator. Bushati e krahason këtë me vizitën e parë të Ramës në Beograd.
“…kalkulimi i tij pervers është pikërisht ky. Të futet në një dialog me ekstremet e margjinalizuara, të mbushura me budallallëk dhe fanatizëm për të dalë triumfues nga këto beteja”, bën me dije Bushati.
“Po të shkojmë edhe përtej rastit grek do të shohim se Rama përdor gjithnjë të njëjtën taktikë, atë të krahasimit me idiotët e ekstremeve. Herën e parë kur udhëtoi për një vizitë zyrtare në Beograd, ai bëri një gjest fare normal, i kërkoi homologut të tij Vuçiç të njihte Kosovën, krejtësisht i bindur se kjo do të tërbonte koret e atyre që thërrisnin “Provokacija”. Dhe nga ky moment Edi Rama u fokusua vetëm tek replikat, batutat dhe shpotitë me ta”, shkruan ai.
Ndaj Bushati thotë se Rama nuk duhet marrë “seriozisht as si anti grek, as si patriot, as si nacionalist. Ai është thjeshtë një narciz” pasi kërkon thjeshtë “harxhim të energjive në drejtim të gabuar dhe krejt të ndryshëm nga problemet reale të vendit”.