Një ditë pas akuzave të kryetarit të PBDNJ-së, Vangjel Dule, se diplomatë të huaj i kërkuan që të hynte në zgjedhje, pasi në mungesë të PD-së mund të sigurojë më shumë deputetë, vërshuan të tjera akuza për diplomat të huaj në Shqipëri. Akuza këto të bëra nga kreu i opozitës Lulzim Basha, apo kryetari I PDK-së Nard Ndoka e të tjerë, mirëpo sipas ministrit Ditmir Bushati “ambasadorët nuk korruptohen”.
Gjatë një takimi me studentë dhe maturantë në Durrës, Bushati deklaroi: “Çdo ambasador në Shqipëri e ka raportin me vendin apo organizatën që përfaqëson. Nuk besoj në teori konspirative dhe nuk besoj që SHBA-të apo BE të influencohen apo korruptohen nga politikanë shqiptarë.”.
Ndër të tjera ministri akuzoi Partinë Demokratike se po vononte zbatimin e Reformës në Drejtësi, kjo përmes bojkotit të Parlamentit. Më tej shton se ky process nuk do mbahet peng nga askush.
“ Askush nuk ka mandat për të marrë peng vullnetin e shqiptarëve. Dihet që reforma në drejtësi është e shumëpritur. Është një reformë për të cilën SHBA dhe BE kanë investuar jo vetëm politikisht por edhe kapacitete njerëzore dhe burime financiare dhe ne besojmë që askush nuk mund ta marrë peng këtë proces.”, shton ministri i Jashtëm.
Kryetari i PBDNJ-së, Vangjel Dule, ditën e djeshme gjatë një takimi me auditorin e Universitetit Europian të Tiranës, ka deklaruar se diplomatë të huaj i kërkuan që të hynte në zgjedhje, pasi në mungesë të PD-së mund të sigurojë më shumë deputetë.
Sipas Dules një diplomat i rëndësishëm, edhe në prani të 4-5 aleatëve të tjerë të Partisë Demokratike, u ka bërë atyre një ofertë të pistë, ose më saktë kriminale për parametrat e demokracisë. (D.D/Shuplaka)
