Ministri i Jashtëm i Shqipërisë, Ditmir Bushati, është njëri prej politikanëve shqiptarë që do të marrë pjesë në inaugurimin e Presidentit të ri të SHBA-ve, Donald Trump.
Gjatë qëndrimit në pritje të kësaj ceremonie, diplomati shqiptar preku çështjen e ndryshimit të administratës në Amerikë.
Ai shprehu falënderimet ndaj administratës Barack Obama, konkretisht Sekretarit amerikan të Shtetit, John Kerry, të cilin e falënderoi për përkushtimin në çimentimin e partneritetit strategjik mes Shqipërisë dhe SHBA-ve.
Më tej, ministri Bushati shprehu besimin se edhe administrata e re do të vijojë angazhimin në Shqipëri.
Shkrimi i ministrit Ditmir Bushati:
Teksa Sekretari Amerikan i Shtetit John Kerry lë detyrën, dëshiroj ta falenderoj përzemërsisht për përkushtimin e dëshmuar në çimentimin e partneritetit strategjik ndërmjet Shqipërisë dhe Shteteve të Bashkuara të Amerikës, sikundër për angazhimin e tij dhe të administratës së Presidentit Barack Obama për konsolodimimin e proceseve demokratizuese dhe forcimin e sigurisë në Europën Juglindore.
Jam besimplotë se Sekretari ri i Shtetit Rex Tillerson dhe administrata e Presidentit Donald J. Trump do të vijojnë angazhimin amerikan në këtë kënd të Europës, si garancia e vetme për të intensifikuar më tej kursin euro-atlantik të rajonit.
(XH.A/SHUPLAKA)
