Kryeministri Edi Rama me të gjitha mënyrat është munduar të ironizojë me çadrën dhe protestën e opozitës. E madje për këtë ka zgjedhur që t’i vendosë edhe epitetin ‘’Qadra’’ duke u përpjekur që të fyejë ndokënd që flet në dialekt.
Po për shkrimtaren Flutura Açka përdorimi i kësaj fjalë nga ana e tij fyen rëndë këdo që në pjesën veriore të Shqipërisë dhe në Kosovë e shqipton me ‘’q’’.
Duke marrë shkas nga nja ‘’amacord’’ i Ramës për Fishtën, Açka thotë që para disa ditësh ai do të ndihej i fyer nga kryeministri.
‘’Fishta Çadrës i thoshte Qadra, zoti Kryeministër. Me gjithë respektin e madh që kam sa herë njerëzit e politikës përmendin dhe nderojnë njerëzit e kulturës, jam e detyruar t’i kujtoj kryeministrit tim me këtë postim, se atij i ka shtegtuar e drejta e këtij nderimi.
Fishta, po të ishte gjallë, Çadra do ta shqiptonte Qadra, fjalë me të cilën lëçitësi ynë në fjalë fyu para pak ditësh një qytetar të thjeshtë – që iu ankua për ca punëra që politikani duhet t’i bëjë më mirë – për t’i kujtuar atij se ishte alpin a gegë, varet çfarë i shkakton për shumë shpërvjelje atij. Qadra, është fjalë që përdor gati dy e treta e shqiptarëve, duke përfshirë edhe Kosovën.
Kështu që një kryeministër që përfaqëson të drejtuarit e shtetit në emër të çdo qytetari të thjeshtë, edhe për ata që nuk e kanë votuar, duhet të kafshojë gjuhën kur flet. Sepse nënkuptimi i fjalës Qadër që ka përdorur pa kurrfarë kujdesi, është një racizëm i pastër dhe i papranueshëm.
Unë po të isha politikane në Kosovë, vetëm prej kësaj fjale dhe me shpotitë e shpeshta që u bën alpinëve, do ta kisha shpallur Persona Non Grata kryeministrin e Shqipërisë. Kryeministri ka të drejtë te bëjë politikë sa të dojë, t’i bëjë Pozitë Opozitës me të gjitha armët politike që ia lejon ligji, por jo duke përdorur Fishtën, gjuhën e të cilit e fyu tërthorazi para ca ditësh, sepse është një përdorim i pandershëm dhe hipokrit…’’, shkruan Açka. (E.K/SHUPLAKA)
Discussion about this post