Ish-deputeti i Partisë Demokratike, Rudolf Marku, i njohur edhe si ish-diplomat, poet, shkrimtar, ka shprehur mendimin e tij mbi protestën e opozitës e cila sot ka hyrë në ditën e 39-të të saj, si dhe për ish-kryeministrin Sali Berisha.
I ftuar në emisionin e moderuar nga gazetari Roland Qafoku, ai është pyetur se çfarë mendon për protestën e PD-së duke qëndruar në çadër në bulevard.
“Estetikisht më vret sytë ajo çadra në bulevard. Por të protestosh është liri dhe si e tillë PD është e lirë të protestojë në një sistem demokratik.”, është shprehur Marku, duke vënë në dukje se pavarësisht përshtypjeve të gjithësecilit jemi në një sistem demokratik.
Pyetjes “Cili është vendi i Sali Berishës në histori?”, ai i përgjigjet duke thënë se Berisha ka një vend të rëndësishëm në histori, sidomos në lëvizjen për demokraci, por e akuzon atë për manipulimin ndaj shpresave të njerëzve.
“Padiskutim që ka vend të rëndësishëm sidomos në lëvizjen për demokraci në vitin 1990-1991. Por Sali Berisha i ka bërë një dëm të madh vendit që sipas meje është manipulimi ndaj shpresave të njerëzve. Kjo është gjëja më e rëndë që ai ka bërë. Por zhgënjimi më i madh ndaj Berishës është kompromisi pas kurrizit të njerëzve të cilët i besonin. Turmave edhe mund t’u thuash gjëra që nuk i beson as vetë por jo njerëzve më të afërt.”, është shprehur ai ndër të tjera.
(XH.A/SHUPLAKA)
