Tërmeti i rënë të shtunën, dhe lëkundjet pasuese në vendin tonë kanë sjellë panik në radhët e qytetarëve, ndërsa hera herës janë shoqëruar dhe me lajme të rreme.
Një i tillë ishte dhe ai i çarjes së një pallati në hyrjen e liqenit, ku banon dhe Flamur Noka dhe Shkëlzen Berisha, i shpërndarë masivisht nga mediat pranë qeverisë.
“Në fotot që ju do të shikoni më poshtë shihen qartë dëmtimet në strukturën e ndërtesës. Pallati ndodhet në zonën e liqenit articial në Tiranë dhe është ndër më të shtrenjtit në Tiranë, ku një metër katror kushton mijëra euro”, shkruajnë disa media që i referohen gazetës Tema.
Mirëpo në një reagim të bërë nga Erla Mëhilli, zëdhënësja e Sali Berishës, e cila po ashtu është banore e këtij pallati, lajmi është i rremë dhe ka për qëllim disinformimin.
Po duket se qeveria nuk ka ndjekur të njëjtin standard, pasi dje shoqëroi dy gazetarë me pretendimin e përhapjes së panikut, ndërsa të njëjtin fat nuk kanë pësuar gazetarët e mediave të tjera.
Fenomeni i lajmeve të rreme është kthyer në shqetësim në shumë vende të botës, disa herë më të zhvilluara nga Shqipëria, po në vendin e shoqërimeve apo terrorit mbi redaksitë, do të duhet një ligj vetërregullues i mediave, që do të vendoste qetësi mbi botën online.
(E.K/Faxweb.al)
