Çako në Komisionin e Sigurisë, asnjë fjalë: Nuk përgjigjem për çështje në procedim

Drejtori i policisë së shtetit Haki Çako është pyetur në komisionin e  sigurisë për paisjen ‘’IMSI CATCHER’’. Kreu i policisë nuk i është përgjigjur asnjë pyetje të drejtuar nga deputetët e Komisionit, pasi sipas tij ai nuk mund të japë informacione për një çështje që është në procedim nga Prokuroria.

DEBATI:

Noka: A ka hyrë paisje përgjimi në Shqipëri?

Çako: Është e drejta e dëshmitarit të përgjigjet për ato që dij, mos më presiono duke më drejtuar përgjigjen që duhet të them. Unë kam referenca ligjore që duhet t’iu përgjigjem.

Noka: A ke dijeni për hyrjen e paisjes?

Çako: Nuk kam ndërmend të përgjigjem, unë iu referohem detyrimeve kushtetuese.

Noka: Ke dijeni apo jo, nuk ka nevojë për të përfshirë Kushtetutën në një pyetje kaq të thjeshtë?

Çako: E drejta juaj nuk lidhet me detyrimin tim, për këtë ka një procedim penal në Prokurori dhe në këto kushte unë nuk mund të cënoj ligjin, nuk mund të jap informacione për Komisionin.

Keltis Kruja: Ministri Tahiri tha se nuk ka detyrë të njohë paisjet që marrin pjesë në hetime, ju a keni dijeni për paisjet që përdoren.

Çako: Përgjigjen korrekte duhet ta japë Prokuroria, gjithçka që kërkoni është në listën e Prokurorisë.

Keltis Kruja: për çdo pyetje ju silleni si boset e mafias amerikane, nuk jepni përgjigje po shpëtoheni me Kushtetutën dhe Prokurorinë.

Dogjani: Komisioni është ngritur duke ditur që për këtë çështje është ngritur një Komision Hetimor, prandaj dëshmitari ka detyrimin që të përgjigjet. Zoti dëshmitar për çafrë vepre jeni implikuar?

Çako: është e drejta juaj të mendoni dhe e drejta ime të përgjigjem në bazë të ligjit. Ligji thotë që ndalohet edhe publikimi i pjesshëm i akteve që kanë të bëjnë me hetimin proceduarial nga ana e organeve të hetimit. Çështja është në hetim dhe nëse doni informacion kërkojani Prokurorisë apo Gjykatës.

Noka: Akuzat janë publike, cila është vepra për të cilën akuzoheni?

Pjerin Ndreu: Mos përdorni termin akuzë, pasi prokuroria nuk e ka marrë si të pandehur dëshmitarin tonë.

Noka: Zoti Ndreu ne nuk do të mësojmë kolegët sesi të ndërtojën pyetjet.

Dogjani: Në një komision hetimor dëshmitari ka detyrë të tregojë për ato që di, ne e kemi të dokumentuar që ajo paisje është future në ambjentet e burgut me preteksin për të matur lagështirën. Ju lutem na thoni, a keni dijeni ju për veprimtaritë e vartësve tuaj?

Çako: Për gjithçka pyesni referojuni Prokurorisë.