Ende po vijonë ndryshimet në Policinë e Shtetit përsa i përket emërimeve të reja dhe largimeve të punonjësve.
Sipas “Panorama” me urdhër të drejtorit të Përgjithshëm, Haki Çakos, është shkarkuar nga detyra drejtori i Laboratorit të Policisë Shkencore, Dritan Zoto. Duhet të sjellim në vëmednje që vetëm pak ditë më parë kreu i Policisë së Shtetit zyrtarizoi ndryshimin e thuajse të gjithë drejtuesve të strukturave të policisë në vend, në qendër dhe në qarqe.
Përsa i përket Dritan Zotos, ai prej disa vitesh ka kryer funksionin e drejtuesit të Laboratorit të Policisë Shkencore, e cila ka për detyrë kryerjen e ekzaminimeve dhe ekspertizave në lidhje me veprat penale që ndodhin në vend, sipas kërkesës së bërë nga Policia Gjyqësore dhe prokuroria.
Mësohet se pas largimit nga drejtimi i Laboratorit të Policisë Shkencore, Dritan Zoto ka këmbyer funksionin e punës me ekspertin Xhevahir Çeloaliaj, që është emëruar drejtues i ri i Institutit të Policisë Shkencore. Deri tani, Çeloaliaj ka mbajtur detyrën e “menaxhimit të pajisjeve laboratorike” në institucionin që tashmë do të drejtojë.
ARSYET E SHKARKIMIT
Në lidhje me ndryshimin e drejtuesit të Policisë Shkencore, nuk ka pasur njoftim nga ana e Policisë së Shtetit. Për rrjedhojë, edhe një motiv zyrtar për këtë shkarkim nuk dihet. Burime jozyrtare kanë thënë se ky ndryshim lidhet me “rokadën” që ka nisur javët e fundit në Policinë e Shtetit me ndryshimin e gjithë kupolës drejtuese.
Ndërkohë, ndryshimi në fjalë vjen në kohën kur Policia Shkencore me kërkesë të prokurorisë ka marrë gjurmët e gishtave të disa politikanëve e deputetëve që po verifikohen në lidhje me ligjin e dekriminalizimit. Po kështu, shkarkimi në fjalë vjen vetëm pak ditë pasi Prokurori i Përgjithshëm akuzoi publikisht Policinë për mungesë transparence në lidhje me asgjësimin e sasive të drogës që kapen rast pas rasti.
Sipas kryeprokurorit, asgjësimi i drogës është bërë pa praninë e prokurorëve në shkelje të kritereve ligjore. Ministri i Brendshëm në një letër publike i kërkoi prokurorisë evidentimin e rasteve konkrete.
(J.V/Shuplaka)
