Lorik Cana ka folur për mediat italiane rreth ndeshjes mes Italisë dhe Shqipërisë, duke u ndalur te evolucioni i kombëtares kuqezi. Sipas ish-kapitenit, meritë të madhe ka Xhani De Biazi i cili bindi talentet e reja të vishnin fanellën kuqezi.
Për evolucionin e kombëtares shqiptare
“Shqipëria në vitet e fundit kishte një bum se mbërriti De Biazi i cili përshpejtoi një proces thelbësor. Ai ka bindur shqiptarët më të mirë të luajnë për Shqipërinë. Në fakt, shpesh bashkëkombësit e mi, të rritur jashtë, kanë zgjedhur të luanin për vendin që i priti, si Behrami, Xhemajli, Xhaka apo Januzaj. Me prurjet e reja u bë një hap i shkëlqyer para”.
Për Strakoshën
“Strakoshën e njoh shumë mirë, kam luajtur me të atin në Kombëtare. Thomas erdhi në klub kur ishte 17 vjeç, tregoi vlera dhe është rritur me punë, ka shfrytëzuar mundësinë e mirë që të jepet një herë në jetë. Mund të bëhet numri një dhe të vazhdojë të rritet, pasi njëra gjë nuk përjashton tjetrën. Marketi dhe Berisha në huazim? I takon klubit të vendosë”.
Për jetën larg fushës
“Futbolli më mungon shumë. Pas Europianit vendosa të ndalem, me 99% është një zgjedhje përfundimtare, pasi shëndeti nuk më lejonte më të luaja në nivelet më të larta. Kam pasur probleme në shpinë që në vitin e parë në Romë që më kanë krijuar shpesh probleme edhe në stërvitje”.
Për Igli Taren
“Me Iglin flas rrallë, në dy vitet e fundit e kam takuar vetëm 2 herë, një në kombëtare dhe një herë kur erdha të takoja ish-shokët në Formelo. Shpresoj të bëjë më të mirën për të ngjitur sa më lart Lacion në të ardhmen, por e di që ka sy për talentet, si për shembull Milinkoviç-Saviç”.
Për të ardhmen
“Unë mendoj që në të ardhmen të vazhdoj të qëndroj në botën e sportit, po vazhdoj punën me fondacionin tim në Shqipëri për të ndërtuar struktura sportive në kopshte. Po vazhdoj edhe kursin si trajner dhe drejtues, shumë shpejt do të vendos se çfarë do të bëj”.
Discussion about this post