Shirat e dendura sot janë bërë shkak që qyteti bregdetar i Durrësit të përmbytet. Ish-kryeministri Sali Berisha, ka publikuar një video të dërguar nga qytetari dixhital në inbox-in e tij, për të treguar situatën, ndërsa nuk ka hezituar që të ia atribuojë përgjegjësinë kryetarit të Bashkisë së Durrësit Vangjush Dako.
“Ç’ben Gjushi per Durresin? Qytetari dixhital shtron kete pyetje dhe dergon nje video te Durresit qe permbytet per 10 min shi!”, shkruan Berisha krahas videos.
Reshjet e dendura të shiut këtë të djelë kanë shkaktuar një situatë kaotike në qytetin bregdetar të Durrësit. Si pasojë e tyre, është bërë i pamundur qarkullimi i këmbësorëve dhe i automjeteve. Probleme më të theksuara raportohen në rrugën “Aleksandër Goga”, në shëtitoren “Taulantia”, tek stadiumi.
Sikur të mos mjaftonte kjo, raportohet se kanë shpërthyer ujërat e zeza te stacioni i trenit të këtij qyteti.
Rrugët pranë Bashkisë së Durrësit janë mbuluar nga shiu, ndërkohë që si pasojë e motit të keq, ka pasur vonesa dhe në ankorimin e trageteve në portin e Durrësit. Kujtojmë se kjo nuk është hera e parë që Durrësi përmbytet si pasojë e shirave të dendur që përfshijnë këtë qytet. (D.D/Shuplaka)
