Kryetari i Bashkisë së Tiranës, Erion Veliaj, ka zbuluar projektin e bashkisë për Piramidën në kryeqytet, e cila është kthyer në një godinë jo funksionale.
Sipas tij, Piramida do të shndërrohet në një qendër të madhe arti që do të ketë në fokus artistët e rinj. Asaj nuk do i mungojë pjesa zbavitëse ku fëmijët do të kenë mundësi të rrëshkasin nga lart.
Këtë lajm, Veliaj e bëri të ditur në emisionin “Koha për t’u zgjuar” ku ai ishte i ftuar dhe ku zbuloi se ky projekt që vjen si rezultat i bashkëpunimit me arkitektët holandezë do i kthejë së shpejti godinën qytetarëve.
“Do ta rikonstruktojmë në këtë funksion. Kemi menduar edhe një lloj shkallare, për fëmijët që duan të rrëshkasin, se dashur pa dashur kjo i ka pëlqyer atyre. Do ketë dhe një kullë vrojtimi. Projekti tjetër është kopshti zoologjik, fëmijët do kenë një hapësirë fantastike. Do jetë një xhevahir, do bashkohet me kopshtin botanik me një tunel, që tashmë është hapësirë e vdekur,” u shpreh Veliaj.
(XH.A/SHUPLAKA)
