Qeveria britanike ka zbuluar planet e saj për të shkurtuar ndjeshëm ndihmën e huaj, me ndikimin më të madh në mbështetjen për arsimin e fëmijëve dhe shëndetin e grave në Afrikë. Ndryshimet vijnë si pjesë e një rishikimi strategjik të ndihmës së jashtme, me qëllimin për të rritur shpenzimet për mbrojtjen kombëtare.
Sipas planit të shpallur në shkurt, buxheti për ndihmën e jashtme do të ulet me 40%, duke zbritur nga 0.5% në 0.3% të të ardhurave kombëtare bruto. Kjo lëvizje synon të rrisë buxhetin e mbrojtjes në 2.5% të PBB-së, nën presionin e aleatëve ndërkombëtarë, sidomos Shteteve të Bashkuara.
Një raport i Ministrisë së Jashtme dhe një vlerësim i ndikimit tregojnë se shkurtimet më të theksuara do të ndodhin në Afrikë, ku pritet ulje e fondeve për programet shëndetësore të grave dhe projektet për kanalizimet e ujit – duke rritur rreziqet për përhapjen e sëmundjeve dhe rritjen e vdekshmërisë.
Rrjeti britanik i organizatave të ndihmës, Bond, paralajmëroi se “gratë dhe fëmijët në komunitetet më të margjinalizuara do të paguajnë çmimin më të lartë”. Përveç shkurtimeve për Afrikën, financimi për Territoret e Pushtuara Palestineze do të reduktohet me 21%, pavarësisht premtimeve të mëparshme për ruajtjen e mbështetjes.
Megjithatë, fondet për organizatat ndërkombëtare si Banka Botërore dhe alianca e vaksinave Gavi do të mbrohen. Qeveria theksoi se Mbretëria e Bashkuar do të vazhdojë të luajë një rol kyç humanitar në kriza si Gaza, Ukraina dhe Sudani.
Baronesha Chapman, ministre për zhvillim, tha:
“Çdo paund duhet të shërbejë më shumë për taksapaguesit britanikë dhe njerëzit që ndihmojmë në mbarë botën. Këto shifra tregojnë se po fokusohemi aty ku ka më shumë ndikim.”
Ministria e Jashtme sqaroi se është bërë një “rishikim strategjik” i ndihmës së jashtme, për të përqendruar burimet në prioritetet kryesore dhe për të mbrojtur fondet humanitare dhe kontratat ekzistuese.
Ndihma dypalëshe – ajo që jepet direkt një vendi – do të ulet për disa shtete, dhe organizatat shumëpalëshe që konsiderohen joefikase do të përballen me shkurtime në të ardhmen. Ende nuk është bërë publik një listë e vendeve që do të preken konkretisht.
Bond kritikoi shkurtimet, duke thënë se ato zhvlerësojnë prioritetet thelbësore:
“Është shqetësuese që financimi për arsimin, barazinë gjinore dhe shëndetin në vendet si Sudani i Jugut, Etiopia dhe Somalia do të ulet,” tha Gideon Rabinowitz, drejtor i politikave.
“Komunitetet më të margjinalizuara në botë – sidomos gratë dhe vajzat – do të paguajnë çmimin e këtyre vendimeve.”
