Studiuesi i rajonit Adri Nurellari i ftuar në Fax News, foli për një sërë çështjesh të vendit të lidhura me rajonin dhe integrimin.
Nurellari komentoi çështjen e çeljes së negociatave me BE-në dhe vendeve skeptike, ku u shpreh se është në të mirë të Shqipërisë që të hapen negociatat si dhe duhet një konsensus i përbashkët ndërmjet partive politike në vend.
“Shpresa ka qenë që Hollanda të ndiqte shembullin e Gjermanisë, por kjo mbetet për tu parë. Do ishte mirë që për sa i përket hapjes së negociatave të kishte një konsensus të brendshëm dhe nga opozita, por duket sikur partitë po pengojnë negocimin, siç ka bërë dhe PS-ja në të kaluarën. Kemi një Déjà vu.
Kemi një fërkim të duarve sa herë që dalin deklarata negative për hapjen e negociatave. Por duhet të kemi parasysh që është një interes i madh për vendin. Monitorimi i intsitucioneve, presioni, do të jetë një asistencë shumë e mirë, që do të rrisi kapacitetet e vendit. Një vend që i hapen negociatat, mund të shihet si një vend që do të ketë interes për investitorët. Do të bëhet më atraktive. Ka një interes kombëtar. Unë shpresoj që për të mirën e Shqipërisë, shpresoj që të hapen negociatat. Ne jemi të prapambetur në këtë proces. Ne kemi pasur të gjitha kushtet për të qenë me para vendeve të rajonit në procesin e integrimit, kemi patur shansin, por jemi mbrapa dhe ky është një turp.”
Për sa i përket marrëveshjes midis Greqisë dhe Shqipërisë për çështjen e detit, Nurellari tha se ky është një lajm i mirë.
“Nuk është gjë e mirë që ne të kemi konflikte të hapura me vendet fqinje, për shumë arsye, si për intergimin në BE, por edhe për afrimin e investitorëve.Mbyllja e problemeve të kalura siç është çështja e Detit na rrit dhe harmoninë midis njërit tjetrit.”
Ndërkohë që për sa i përket marrëveshjes se vitit 2009, Nurellari u shpreh se kanë qenë grupet qytetare që e kanë kundërshtuar. Sipas tij në vitin 2009 në asnjë moment nuk kemi parë harta të propozuara nga ana e Shqipërisë dhe se pala greke kërkonte që të mbyllte marrëveshjen në mënyrë të përshpejtuar.
(M.Q/Faxweb)
