Këshilli i Ministrave miratoi sot vendimin për ndërtimin e centralit gjenerues të energjisë elektrike fotovoltaike për vetëprodhim dhe veprave ndihmëse në zonën e Aeroportit të Kukësit, njësia administrative Shtiqën, në Kukës, nga shoqëria “Global Technical Mechanics”.
Kapaciteti i instaluar i këtij centrali do të jetë 12 MW. Ky central nuk nuk është objekt koncesioni dhe nuk përfiton nga masat mbështetëse. Sipas vendimit, koha për ndërtimin, pajisjen me lejen e ndërtimit dhe vënien në operim të impiantit fotovoltaik do të jetë brenda 36 muajve nga hyrja në fuqi e vendimit.
Ministria e Infrastrukturës dhe Energjisë dhe Agjencia Kombëtare e Burimeve Natyrore kanë të drejtë të ushtrojnë mbikëqyrje të përgjithshme me afate 3-mujore gjatë realizimit, vënies në punë dhe operimit, me synim që të verifikojnë se ecuria e punimeve, cilësia, konformiteti dhe operimi janë në përputhje me programin e përgjithshëm të realizimit dhe të dokumentacionit të projektit.
Shoqëria “Global Technical Mechanics” ka detyrimin që të paraqesë periodikisht (çdo tre muaj) pranë Ministrisë së Infrastrukturës dhe Energjisë dhe Agjencisë Kombëtare të Burimeve Natyrore informacion për ecurinë e ndërtimit të centralit fotovoltaik. Në këtë kontratë përcaktohen të drejtat dhe detyrimet e palëve për realizimin e këtij projekti, penalitetet, në rast mosrealizimi, si dhe çështje të tjera që lidhen me zbatimin e saj.
Kompania do t’i japë falas, në formë royalty, ministrisë përgjegjëse për energjinë sasinë e energjisë elektrike, në masën 2 (dy) % të sasisë vjetore të prodhimit të energjisë elektrike ose konvertimin e saj në vlerë monetare. Në rast konvertimi në vlerë monetare, shuma duhet të derdhet tërësisht në buxhetin e shtetit. Sipas rastit, një pjesë e prodhimit të burimit gjenerues të energjisë duhet t’i shitet furnizuesit publik, sipas legjislacionit në fuqi.
