Në një kohë kur palët politike në vendin tonë kishin lënë si afat të fundit për përmbylljen e Reformës Zgjedhore, 31 Majin, duket se një pikë kthese ka ardhur nga ambasadorja amerikane Yuri Kim, e cila iu ka kërkuar palëve politike ndryshimin e sistemit, që kërkon ndërhyrje dhe në Kushtetutë.
Teksa ka zhvilluar të paktën dy takime me kryeministrin Edi Rama, mësohet se SHBA tashmë kërkon një sistem zgjedhor në Shqipëri me lista të hapura, dhe për këtë ka dhënë si shembull modelin zgjedhor danez. Sistem proporcional rajonal me votim preferencial është propozimi i ambasadores amerikane që i është dërguar edhe tryezës së Reformës Zgjedhore, përmes një emaili në postën elekronike.
Por çfarë është sistemi zgjedhor danez?
‘D’Hondt’ quhet ndryshe dhe është i përbërë nga dy lista ku tek e para është lista e hapur ku mund të votohet preferencialisht kandidati për deputet kurse tek e dyta është ajo e mbyllur kombëtare ku votohet partia respektive.
Kërkesa për ndryshimin e sistemit është bërë vazhdimisht dhe nga opozita parlamentare e Rudina Hajdarit, e cila e ka kushtëzuar votën e saj për Reformën zgjedhore pikërisht me ndryshimin e sistemit, pasi sipas saj Kuvendi është mbushur me ushtarë të drejtuesve të partive.
I pyetur gjatë ditës së djeshme në fundin e protestës së Aleancës për Mbrojtjen e Teatrit, Lulzim Basha tha se nuk kishte dijeni në lidhje me këtë propozim të ambasadores Kim, dhe tha se do ta mendonte një propozim të tillë. (E.K/Faxweb.al)