Kreu i PD-së Lulzim Basha do të zhvillojë një takim me krerët e partive aleate në orën 10:30 në selinë e PD-së. Objekt i takimit do të jetë vijimësia e aksionit opozitar, si dhe protesta kombëtare që do të mbahet pas dy ditësh, në 25 Maj, përpara kryeministrisë.
Takimi midis tyre vjen një ditë pas letrës së hapur që kryeministri Edi Rama i drejtoi Bashës për t’i kërkuar dialog për zgjidhjen e krizës politike, por që mori përgjigje të prerë nga kryedemokrati dje nga takimi i tij në Durrës dhe po ashtu me një mesazh në rrjetet sociale.
“Fjalën vendimtare për zgjidhjen njëherë e përgjithmonë të plagëve që shkaktojnë këtë krizë, do ta kenë shqiptarët! Nuk do të ketë pakte kulisash, do të ketë një dialog kombëtar dhe në fund një vendimarrje me referendum nga populli. Asnjë hap pas!”, u shpreh dje Basha.
Mbetet për t’u parë se cilat do të jenë lëvizjet e radhës të forcave politike në vend, ndërsa presidenti Ilir Meta deklaroi njëherë e mirë dje se ai nuk do të bëhet negociator për të ulur qeverinë dhe opozitës në një tavolinë diskutimi.
(E.K/Faxweb.al)
Discussion about this post