Në Kosovë kuvendi sot ka votuar mocionin e mosbesimit dhe ka rrëzuar qeverinë e Isa Mustafës. Pas afërisht tri orë diskutimesh dhe akuzave të ndërsjella, Kuvendi i Kosovës e ka mbështetur me 78 vota mocionin e opozitës për rrëzimin e Qeverisë së kryeministrit, Isa Mustafa. Pas një përplasje mes PDK-së dhe AK-së, 34 deputetë kanë votuar kundër rrëzimit të qeverisë së Isa Mustafës dhe tre deputetë abstenuan.
Rënia e qeverisë së Kosovës erdhi pas një krize të thellë politike e cila ka filluar që nga firmosja e dy marrëveshjeve për demarkacionin dhe asosacionin e komunave serbe në veri. Sipas kushtetutës së Kosovës vendi hyn në zgjedhje pas 45 ditësh nga rrëzimi i qeverisë.
“Nuk dëshiroj të komentoj çka ndodhë, çka po bëhet, kush kujt ju bashkangjit. Ju falënderoj për bashkëpunimin, ky Parlament meriton të ketë njerëz që i çojnë proceset përpara. Me vjen mirë që sot janë deputetët në Kuvend e jo jashtë tij, ju uroj shëndet dhe uroj të votoni sipas bindjes “, ka deklaruar Mustafa pas marrjes së vendimit. (J.V/Shuplaka)
Discussion about this post