Tre ditë pas zgjedhjeve, drejtori teknik i OSHEE-së u shkarkua nga detyra. Sot organi zyrtar i Partisë Demokratike ‘’Rilindja Demokratike’’ jep versionin e demokratëve lidhur me këtë vendim.
Sipas ‘’RD-së’’, shkarkimi i Mustafës fsheh një skandal që është denoncuar më parë nga ish-kryeministri Sali Berisha, madje që në 16 qershor të këtij viti.
“Kriza energjetike tashmë është evidente dhe burime nga OSHEE bëjnë me dije se kanë filluar blerjet e energjisë nga jashtë.
Në krye të OSHEE është rikthyer Ardit Çela, njeriu që ka firmosur çdo tender abuziv përgjatë katër viteve të qëndrimit të tij në krye të këtij institucioni. Tashmë është rikthyer sërish aty për të realizuar një megavjedhje tjetër”, shkruan “RD”.
Në këtë artikull, Rilindja Demokratike shton se e gjitha kjo lidhet me një kredi të marrë më parë nga Banka Botërore.
“burime nga KESH shprehen se bëhet fjalë për përdorimin e një kredie të marrë nga Banka Botërore për blerjen e energjisë nga KESH.
Në fakt, autoriteti që përgjigjet për blerjen e energjisë në kohën kur nivelet e hidrocentralave në vend janë në kuaota të ulta është OSHEE.
Por këtë herë këtë procedurë do ta kryejë institucioni që përgjigjet për prodhimin dhe jo për importin. Bëhet fjalë për rreth 150 milionë euro të Bankës Botërore që janë dhënë kredi për këtë qëllim. Pra, KESH do ja blejë operatorëve ndërkombëtarë, dhe më pas do ja shesë OSHEE me çmim më të lartë se ai i prodhimit, ndërkohë që kjo procedurë duhet të ndiqej drejtpërdrejt nga OSHEE dhe s’kishte pse ngrihej çmimi rrugës”, shkruan më tej “RD”.
Madje më tej ‘’RD’’ shton se kjo është edhe arsyeja se përse Haki Mustafa nuk i duhej nëpërkëmbë socialistëve. (D.D/Shuplaka)
Discussion about this post