Kryeministri Rama është pyetur nga ana e gazetarëve në lidhje me çfarë ka bërë Shqipëria për të garantuar që Kosova të mos dështojë si dy vite më parë për hyrjen në UNESKO. Rama u shpreh se për votat nuk mund të garantojë dot gjë sa kohë që jemi në demokraci.
‘’ Në botën demokratike askush nuk mund të thojë dot që i ka votat. Ju e keni parë që thonë disa që i kemi votat dhe pastaj dalin që nuk i kanë”, u shpreh Rama duke thumbuar kështu dhe rrjedhjen e votave pak ditë më parë në Kuvend për zgjedhjen e Gramoz Ruçit si kryetar.
Gazetari: Vuçiç pak ditë më parë u shfaq i alarmuar në selinë e OKB, a i ka votat Kosova për të hyrë në UNESKO?
Haradinaj: Kosova do të jetë një vend i vlefshëm për të hyrë në UNESKO pasi i ka të gjitha vlerat e trashëgimisë kulturore dhe historike.
Gazetari: Çfarë ka bërë Shqipëria që të mos ketë një dështim si ai i dy viteve më parë?
Rama: Unë ja kam thënë Vuçiç-it në të gjitha takimet se pse duhet që të ketë një panik për hyrjen e Kosovës në UNESKO.
Ata duhet të ishin të parët që të vraponin për t’i mbrojtur këto pasuri. Kush humbet në këtë rast? Kosova humbet më pak. UNESKO dihet se për çfarë është, i duhet Serbisë që të jetë në Kosovë për të ruajtur atë që ata e quajnë trashëgimi të tyren.
Është absurd qëndrimi serb. Unë këtë e kam ndarë me presidentin serb, besoj se sot do të japë një përgjigje në lidhje me këtë. Në botën demokratike askush nuk mund të thojë dot që i ka votat. Ju e keni parë që thonë disa që i kemi votat dhe pastaj dalin që nuk i kanë.
Kujtojmë se dy vite më parë Kosova për vetëm pak vota nuk mundi të ishte dot pjesë e UNESKO-s.
(E.K/SHUPLAKA)
