Disa ditë pas vrasjes së Agim Arapit në Durrës, bashkëshortja e tij tregon detaje të reja lidhur me ngjarjen e rëndë ku humbi jetën pronari i supermarketit në lagjen nr. 1 të qytetit. Vjollca Arapi ka rrëfyer me lot në sy dhunën barbare ndaj të shoqit, teksa ajo ishte e pranishme, edhe si e gjeti të vdekur pasi ishte larguar për disa minuta.
Në një rrëfim për një gazetë të përditshme, ajo shprehet se gjithçka nisi pasi vetë ajo i kërkoi Jurgen Kurtit t’u jepnin detyrimin prej 13 mijë lekësh dhe si ai ia ktheu: “Ai m’u përgjigj në mënyrë shumë të ashpër dhe banale. Madje, edhe më kërcënoi. Më tha “Çfarë lekësh do ti moj, po ik andej, mos na bëj numra shumë”. Në këtë moment zbriti Gimi, i cili i tha se nuk ishte mirë që sillej ashtu, pasi ishim në moshën e prindërve të tij.”
Kjo ngjarje u pasua nga dhuna e ushtruar ndaj bashkëshortit të saj brenda ambientit të dyqanit të tyre, ku ajo ishte e pranishme. Vjollca Arapi shprehet se një moment u largua për të kërkuar ndihmë e kur u kthye e gjeti të vdekur të shoqin.
“Kur u ktheva unë në dyqan e gjeta të vdekur. Ishte i masakruar totalisht. Unë nuk e pashë fillimisht Jurgenin ku ndodhej, pasi dola për të kërkuar ndihmë në lagje. Këtë thashë edhe në polici, që nuk e kisha parë nëse kishte marrë pjesë në sulm apo jo. Por kur iu ktheva filmimit të kamerave të sigurisë që i kemi në dyqanin tonë pashë se Jurgeni kishte hyrë brenda në dyqan dhe e kishte goditur Gimin me një mjet të fortë në pjesën e fytyrës. Policia e ka lënë të lirë, por ai duhet të jetë brenda. Ai para një viti vrau babain e tij dhe mori në qafë dajën, ndërsa tani mori në qafë bashkëshortin tim, por edhe vjehrrin e tij.”, rrëfen ajo duke kërkuar që të vihet drejtësi.
Referuar rrëfimit të saj, Agim Arapi kishte rreth 8 muaj që kishte kryer një ndërhyrje në zemër, ndaj nuk i kishte bërë dot ballë agresionit dhe dhunës ndaj tij.
(XH.A/SHUPLAKA)
